Oliy Majlistiń Insan huqıqları boyınsha wákili (Ombudsman), Sociallıq qorǵaw milliy agentligi hám Ózbekstan kásiplik awqamları federaciyası tárepinen «Huqıq bilimdanı» Ombudsman viktorinasınıń juwmaqlawshı basqıshı ótkerildi.

Insan huqıqları menen erkinliklerin ámelge asırıwda imkaniyatlardıń teńligin támiyinlew, ásirese, jetim balalar hám ata-anasınıń qaramaǵınan ayırılǵan balalardıń huqıqları, erkinlikleri hám nızamlı máplerin támiyinlew úlken áhmiyetke iye.
Mehriybanlıq úyi tárbiyalanıwshıları arasında huqıqıy xabardarlıqtı arttırıw, olardı nızamǵa húrmet ruwxında tárbiyalaw itibardan shette qalmawı zárúr.
Usı maqsette Mehriybanlıq úyi tárbiyalanıwshılarınıń huqıq tarawına bolǵan qızıǵıwshılıǵın hám bilimlerin arttırıwǵa qaratılǵan joybar 1-iyun – Xalıqaralıq balalardı qorǵaw kúnine baǵıshlandı.
Eki basqıshtan ibarat bul viktorinada Tashkent qalasında jaylasqan Mehriybanlıq úyleriniń 100 ge shamalas tárbiyalanıwshısı qamtıp alındı.
Atap aytqanda, qalaımızdaǵı 22 hám 30-sanlı Mehriybanlıq úyleriniń ózbek hám rus tillerinde bilim alatuǵın joqarı klass oqıwshıları viktorinanıń 1-basqıshında qatnastı.
Ombudsman viktorinasınıń juwmaqlawshı basqıshına testlerden eń joqarı ball toplaǵan 10 oqıwshı qatnastı.
Viktorina qatnasıwshılarınıń bilimi usı joybar intakerleri, senator hám deputatlar jáne Balalar ombudsmanı tárepinen bahalandı.
Qatnasıwshılar belgilengen waqıt ishinde berilgen teoriyalıq hám turmıslıq waqıyalardan kelip shıǵıp dúzilgen ámeliy sorawlarǵa juwap berdi.
Dáslep viktorinanıń final basqıshına jetip kelgen 6 qatnasıwshıǵa minnetdarshılıq xatı hám estelik sawǵaları tapsırıldı.
Bunnan soń tóreshiler quramı aǵzaları tárepinen berilgen ballar tiykarında anıqlanǵan jeńimpazlar diplom hám bahalı sawǵalar menen sıylıqlandı.
Maǵlıwmat ornında atap ótiw orınlı, Ózbekstan Respublikası Konstituciyasına muwapıq, mámleket hám jámiyet jetim balalardı jáne ata-anasınıń qáwenderliginen ayırılǵan balalardı baǵıw, tárbiyalaw, olardıń bilim alıwı, salamat, tolıq hám hár tárepleme kamalǵa keliwi, sonday-aq, balanıń huqıqları, erkinlikleri hám nızamlı máplerin támiyinlew, onıń fizikalıq, aqılıy hám mádeniy jaqtan tolıq rawajlanıwı ushın eń jaqsı sharayatlardı jaratadı.

N.Abduraimova, ÓzAnıń xabarshısı