Mámleketimizde alıp barılǵan máhálle baslıqların saylaw procesi orınlarda xalıqtıń dawıs beriw jolı menen ashıq aydanlıqta alıp barılıp, saylanǵan máhálle baslıqları óz jumısların basladı.

Xojeli rayonında rayon hákimi J.Ermashev basshılıǵında jańadan saylanǵan máhálle baslıqları menen ushırasıw ótkerildi. Ushırasıwǵa Ózbekstan máhálleleri associaciyasınıń rayonlıq bólimi baslıǵı N.Paxratdinov, rayonlıq shólkemlestiriw-kadrlar toparı baslıǵı D.Tadjimuratov hám 28 máhálle aqsaqalları qatnastı.
Ilajda sózge shıqqanlar xalqımızdıń abadan turmısın támiyinlew, máhállelerdegi mashqalalarǵa sheshim tabıw baǵdarındaǵı qabıl etilgen qarar hám pármanlarǵa keń túrde toqtap ótti. Atap aytqanda, Prezidentimizdiń 2023-jıl 21-dekabrdegi «Máhálle institutınıń jámiyettegi rolin túp-tiykarınan arttırıw hám onı xalıqtıń mashqalaların sheshiwde baslanǵısh buwın sıpatında islewin támiyinlewge qaratılǵan ilajlar haqqında»ǵı pármanı, 2023-jıl 21-dekabrdegi «Ózbekstan máhálleleri assosaciyasınıń jumısın jolǵa qoyıw hám máhállelerde basqarıw sistemasın jetilistiriwge baylanıslı qosımsha ilajlar haqqında»ǵı qararı talapların túsindirdi. Ushırasıw dawamında puqaralar jıyınları baslıqlarınıń wazıypaları birme-bir atap ótilip, aymaqlarda óz jumısın durıs shólkemlestiriw hám xalıqtıń mashqalasın sheshiwde «máhálle jetiligi» menen birge islesiw tártibin jolǵa qoyıw baǵdarındaǵı wazıypalar belgilep alındı.

Qaraqalpaqstan xabar agentligi