Taraw wákilleriniń atap ótiwinshe, muzlardıń eriwi globallıq klimattı normadaǵıdan jáne 0,430S dárejege ısıtıp jiberedi.

Ózbekstan Respublikası ekologiya, qorshaǵan ortalıqtı qorǵaw hám klimat ózgeriwi ministri Aziz Abduhakimovtiń basshılıǵındaǵı delegaciya Dushanbe qalasında (Tájikstan) bolıp ótken muzlıqlardı saqlaw boyınsha joqarı dárejedegi xalıqaralıq konferenciyada qatnastı.

Ekologiya, qorshaǵan ortalıqtı qorǵaw hám klimat ózgeriwi ministrligi baspasóz xızmetiniń málim etiwinshe, A.Abduhakimov Oraylıq Aziyada suw qáwipsizligi hám turaqlı rawajlanıw ushın muzlıqlardı qásterlep saqlaw úlken áhmiyetke iye ekenin atap ótti.
Qatnasıwshılardı mámleketimizde ámelge asırılıp atırǵan ekologiyalıq reformalar, sonıń ishinde, «Jasıl mákan» baslaması, Aral teńiziniń qurıǵan túbin kóklemzarlastırıw, jasıl texnologiyalar hám suwdı únemlew sistemaların engiziw joybarları menen tanıstırdı.
Ministrler sóylesiwi sheńberinde klimat turaqlılıǵı, muzlıqlardı saqlaw hám suw tarawındaǵı birge islesiw máseleleri dodalandı.
Ózbekstan ekologiyalıq siyasatqa kompleksli qatnastı usınıw: «jasıl» ekonomika strategiyası, Milliy beyimlesiw rejesi, Ózbekstan Respublikası Prezidenti janındaǵı Klimat keńesi hám Milliy klimat orayın shólkemlestiriw. RESILAND joybarı, “Kopernik” baǵdarlaması sheńberinde Evropa Awqamı menen birge islesiw hám muz kóllerin monitoring etiw boyınsha YuNESKO joybarlarında qatnasıwǵa ayrıqsha itibar qaratıldı.
Klimattanıwshılıqqa baǵıshlanǵan sessiyada region mámleketleri klimat boyınsha birden-bir maǵlıwmatlar bazasın jaratıw zárúr ekenligin dodaladı. Ózbekstan Oraylıq Aziyanı «jasıl» rawajlandırıw koncepciyasın juwmaqlaw hám 2026-jılǵa mólsherlengen «jol kartası»n tayarlaw boyınsha ekspert toparın qáliplestiriwdi usınıs etti.
Sonday-aq, Oraylıq Aziya qorshaǵan ortalıq hám klimat ózgeriwin úyreniw universitetiniń (“Green University”) ekologiya, suwdı únemlew hám qayta tiklenetuǵın energiya tarawlarında kadrlar tayarlaw boyınsha ilimiy platforma sıpatındaǵı roli de tastıyıqlandı.

Muhayyo Toshqoroeva, ÓzA