Házirgi dáwirde korrupciya kóplegen mámleketlerdiń ekonomikalıq hám siyasiy potencialına óziniń unamsız tásirin kórsete aldı. Oǵan qarsı gúresiw, turaqlı túrde ámelge asırılıwı zárúr bolǵan áhmiyetli wazıypalardan birine aylandı.

Mine, usı maqsette Qaraqalpaqstan Respublikası Ósimlikler karantini hám qorǵaw agentligi tárepinen «Korrupciya – mámleket rawajlanıwına tosqınlıq etiwshi illet» atamasında ilaj shólkemlestirildi.
Onda Qaraqalpaqstan Respublikası prokuraturasınan wákiller qatnasıp, korrupciyanıń kelip shıǵıwı, onıń sociallıq, ekonomikalıq hám ruwxıy zıyanları, korrupciyaǵa qarsı gúresiӯdiń huqıqıy tiykarları hám mexanizmleri, Ózbekstanda korrupciyaǵa qarsı gúresiw boyınsha qabıl etilgen normativlik-huqıqıy hújjetler hám olardıń mazmun-mánisi, tiykarǵı principleri haqqında maǵlıwmatlar berdi.
Atap ótilgenindey, 2017-jıl 3-yanvarda “Korrupciyaǵa qarsı gúresiw haqqında”ǵı Ózbekstan Respublikasınıń Nızamı qabıl etilip, elimizde korrupciyaǵa qarsı gúresiwdiń huqıqıy mexanizmi jaratıldı. Onıń tiykarǵı maqseti korrupciyaǵa qarsı gúresiw tarawındaǵı qatnasıqlardı tártipke salıwdan ibarat.
Usı nızamınıń 3-statyasında tiykarǵı túsinikler berilgen bolıp, onda korrupciyaǵa baylanıslı huqıqbuzarlıq hám mápler soqlıǵısıwına baylanıslı túsiniklerge sıpatlama berilgen, yaǵnıy korrupciya – shaxstıń óziniń lawazım yamasa xızmet dárejesinen jeke máplerin, yamasa basqa shaxslardıń máplerin gózlep materiallıq yamasa materiallıq emes payda alıw maqsetinde nızamǵa qayshı túrde paydalanıw, sonday-aq, bunday paydanı nızamǵa qayshı túrde usınıw.
Bul Nızam, óz gezeginde, puqaralarǵa korrupciya hám korrupciyaǵa baylanıslı huqıqbuzarlıqtıń ne ekenligi hám olardıń unamsız illetleri haqqında maǵlıwmat beredi.
Ilajda 2024-jıl 5-iyun kúni qabıl etilgen Ózbekstan Respublikasınıń «Mápler soqlıǵısıwı haqqında»ǵı Nızamınıń mazmun-mánisi de túsindirildi. Nızamda mámleketlik uyımlardıń yaki basqa shólkemniń xızmetkeri, mápler soqlıǵısıwı, mápler soqlıǵısıwın tártipke salıw boyınsha arnawlı bólim, jeke mápdarlıq, jaqın tuwısqanlar sıyaqlı tiykarǵı túsinikler kirgizilgenligi atap ótildi.
Sonday-aq, ilaj dawamında nızamshılıq analizi korrupciya menen baylanıslı qılmıslarǵa qarsı gúresiwdiń huqıqıy tiykarları kóbirek Ózbekstan Respublikasınıń ámeldegi Jınayat kodeksinde óz sáwleleniwin tapqanlıǵı haqqında da pikirler bildirildi.
Qatnasıwshılar qánigelerden ózlerin qızıqtırǵan sorawlarǵa juwap aldı.

Qaraqalpaqstan xabar agentligi