Qaraqalpaqstan Respublikası delegaciyasınıń Birlesken Arab Ámirliklerine ámeliy saparı sheńberinde Ózbekstannıń Egipettegi elshixanasınıń járdeminde Joqarǵı Keńes Baslıǵı Amanbay Orınbaev hám Egipettiń “Bell Energy” kompaniyasınıń basqarma baslıǵı Haysam Husayn arasında ushırasıw bolıp ótti.

Ámeliy ruwxta ótken sóylesiwler dawamında Qaraqalpaqstannıń investiciyalıq potencialı, ekonomikalıq imkaniyatları, sonday-aq, birgeliktegi xalıqaralıq joybarlardı ámelge asırıw perspektivaları dodalandı.
Ushırasıw juwmaǵında Qaraqalpaqstan Respublikası Ministrler Keńesi, “Bell Energy” hám onıń biznes sherikleri arasında ulıwma bahası 660 million dollarǵa teń bes óz-ara túsinisiw memorandumına qol qoyıldı. Bul hújjetler neft ónimleri ushın jer astı qoymaxanaların qurıw, “Qayraqtas” altın kánin ózlestiriw, shıǵındılardan energiya islep shıǵarıw texnologiyaların engiziw, bioetanol hám aviaciya janılǵısın islep shıǵarıw ushın bambuk plantaciyaların jaratıw, balalardı qollap-quwatlaw hám olardıń abadanlıǵın támiyinlewge qaratılǵan sociallıq joybardı iske qosıw sıyaqlı bir qatar iri baslamalardı ámelge asırıwdı názerde tutadı.
Tárepler hár bir joybar boyınsha texnikalıq parametrler hám finanslıq shártlerdi tolıq islep shıǵıwǵa kelisip aldı.

Aziza ALIMOVA tayarladı, ÓzA