Kegeyli rayonında sporttıń futbol hám kishi futbol túri boyınsha er balalar hám qızlar arasında ótkerilgen «Mámleketlik qáwipsizlik xızmeti kubogi» jeńimpazların sıylıqlaw máresimi bolıp ótti.

Ilajǵa rayon hákimi A.Kamalov, Mámleketlik qáwipsizlik xızmeti rayonlıq bólimi baslıǵı Z.Botirov, rayon prokurorı I.Abdullaev hám sportshı-jaslar qatnastı.
Sıylıqlaw keshesinde sózge shıqqanlar jeńimpazlardı qutlıqlap, bul ilajlar máhállelerdegi jaslardıń salamatlıǵın arttırıw, jaslarımızdı ǵalaba túrde sportqa qamtıw maqsetinde ótkerilip atırǵanlıǵın atap ótti hám eń shaqqan, eń kúshli dep tabılǵan komandalar múnásip sıylıqlandı.
Kishi futbol boyınsha Mámleketlik qáwipsizlik xızmeti kubogi jarısında, qızlar arasında birinshi orındı Abat awıl puqaralar jıyını komandası jeńip alǵan bolsa, ekinshi hám úshinshi orınlar Jańabazar hám Júzimbaǵ elatları komandalarına nesip etti.
Al, jigitler arasında bolsa, altın medaldı Mádeniyat mákan puqaralar jıyını jasları jeńip aldı.
Sıylı ekinshi hám úshinshi orınlardı Baxıtlı hám Jańabazar elatları komandaları iyelewge eristi.
Futbol boyınsha ótkerilgen jarıs juwmaǵında, aqtubalı jaslar barlıq qarsılasların jeńip shıǵıp, kubok iyesine aylandı.
Xalqabad hám Mádeniyat MPJ komandaları gúmis hám qola medallarına ılayıq dep tabıldı.
Jarıs sońında jeńimpaz komandalar shólkemlestiriwshiler tárepinen tayarlanǵan arnawlı diplom, medal, kubok hám estelik sawǵalar menen sıylıqlandı. Sonday-aq, sıylıqlaw máresiminde Mámleketlik qáwipsizlik xızmeti kuboginde oyınlardı ádil basqarıp barǵanı ushın tóreshiler quramı aǵzalarına estelik sawǵalar tapsırıldı.

Adilbay Orazov,
Qaraqalpaqstan xabar agentligi sholıwshısı