Ózbekstan isbilermenleriniń 10-13-may kúnlerine belgilengen Qabul hám Mozori Sharif qalalarına saparı sheńberinde bir qatar ushırasıwlar, ámeliy ilajlar ótkerilmekte.

Awǵanstanǵa sapardıń birinshi kúninde Sawda-sanaat palatasınıń baslıǵı Davron Vahobov basshılıǵındaǵı delegaciya aǵzaları azıq-awqat hám farmacevtika tarawların tártipke salıwshı juwapker uyımlardıń wákilleri menen ushırastı. Sóylesiw waqtında awǵan tárepi respublikamızda islep shıǵarılǵan ónimlerdi jergilikli bazarǵa import etiw procesinde saqlanıwı kerek bolǵan talap, normalar, sırt elli isbilermenlerge jaratılǵan imkaniyat, qolaylı sharayat haqqında tolıq maǵlıwmat berdi. Wákillerimiz Qabulda Ózbekstan ónimleri ushın shólkemlestirilgen Sawda úyine ónimdi jaylastırıw, sawda orınlarında kórsetiw shólkemlestiriw hám satıwǵa tayarlaw procesinde belsene qatnastı.

Bul birge islesiw missiyası eki qońsı mámleket biznes subektleri arasında tikkeley sawda baylanısın jolǵa qoyıw, milliy eksport potencialın keńeytiw hám regionallıq ekonomikalıq birge islesiwdi rawajlandırıwǵa xızmet etedi.
Jeke menshik sektorlardıń qatnasıwında bolıp ótken “Biznes birge islesiwdi bekkemlew” temasındaǵı ushırasıwda qatnasqan 200 ge shamalas isbilermen arasında 40 tan aslam qurılıs materialları, 21 elektrotexnika, 16 azıq-awqat sanaatı hám 12 toqımashılıq hám basqa da taraw wákilleri – jámi 100 den aslam ózbekstanlı isbilermen bar edi.
– Biznes-sóylesiwler qızǵın ótti, – dedi Ózbekstan eksportshıları associaciyasınıń baslıǵı Yorqin Malikov. – B2B ushırasıwı dawamında tárepler óz-ara paydalı tarawlarda birge islesiw jolları, sonıń ishinde, awıl xojalıǵı ónimleri, toqımashılıq, qurılıs materialları sawdası, logistika hám transport tarawlarında sheriklikti jolǵa qoyıw máseleleri dodalandı. Ilaj juwmaǵında bir qatar perspektivalı baslamalar boyınsha dáslepki kelisimlerge erisildi. Isbilermenler arasında tikkeley baylanıslar ornatılıp, sawda hám investiciyalıq joybarlardı ámelge asırıw ushın jumısshı toparlar shólkemlestiriw ideyası maqullandı.
Bunday ilajlar hár eki mámleket ekonomikası ushın úlken áhmiyetke iye ekeni atap ótilip, sheriklikte izbe-izlikke erisiw zárúr ekenligi atap ótildi.

M.Pirmatova, ÓzA