Ózbekstan Respublikası Prezidenti Shavkat Mirziyoev 7-aprel kúni Parlamentleraralıq Awqamnıń 150-yubiley Assambleyası sheńberinde bir qatar parlamentler hám xalıqaralıq shólkemlerdiń basshıları menen ushırasıw ótkerdi.

Mámleketimiz basshısı dáslep Rossiya delagaciyasına basshılıq etip atırǵan Rossiya Federaciyası Federal Majlisi Federaciya Keńesiniń Baslıǵı Valentina Matvienkonı qabılladı.
Ushırasıw basında mámleketimiz basshısı Valentina Matvienkonı tuwılǵan kúni menen qızǵın qutlıqlap, oǵan bekkem densawlıq, baxıt-ıǵbal hám úlken tabıslar tiledi.
Federaciya Keńesiniń baslıǵı Ózbekstan jetekshisine shın júrekten minnetdarshılıq bildirip, Rossiya Prezidenti Vladimir Putinniń sálemin hám jaqsı tileklerin jetkerdi.
Ózbekstan menen Rossiya arasındaǵı keń kólemli strategiyalıq sheriklik hám awqamlaslıq qatnasıqların bunnan bılay da bekkemlew máseleleri kórip shıǵıldı.
Parlamentleraralıq baylanıslar nátiyjeli bolıp atırǵanı joqarı bahalandı.
Joqarı dárejelerde erisilgen kelisimlerdiń orınlanıwı ústinen parlamentlik qadaǵalaw boyınsha jedel birge islesiwdi dawam ettiriw áhmiyetli ekeni atap ótildi.
Sawda-ekonomikalıq sherikliktiń potencialın támiyinlew, sanaat kooperaciyası joybarları hám gumanitarlıq almasıw baǵdarlamaların qollap-quwtalawǵa ayrıqsha itibar qaratıldı.
Ázerbayjan Respublikası Milliy Majlisi Baslıǵı Sohiba Gafarova ushırasıw aldında Ózbekstan jetekshisine Ázerbayjan Prezidenti Ilham Alievtiń sálemi hám eń jaqsı tileklerin jetkerdi.
Ózbekstan menen Ázerbayjan arasındaǵı doslıq, strategiyalıq sheriklik hám awqamlaslıq qatnasıqların jáne de keńeytiw hám bekkemlewdiń áhmiyetli máseleleri kórip shıǵıldı.
Ekonomikalıq birge islesiw jılı sheńberinde birgelikte nátiyjeli jumıslar ámelge asırılıp atırǵanı qanaatlanıwshılıq penen atap ótildi. Tovar almasıw kólemi artpaqta, ekonomikanıń hár qıylı tarmaqlarında kooperaciyalıq joybarlar jedel túrge engen. Mádeniy-gumanitarlıq ilajlar turaqlı ótkerip kelinbekte.
Erisilgen kelisimlerdiń orınlanıwın qadaǵalaw hám bolajaq joqarı dárejedegi sammitler ushın jańa usınıslar islep shıǵıw maqsetinde parlamentler arasında tıǵız ámeliy birge islesiwdi hám jedel almasıwlardı dawam ettiriw áhmiyetli ekeni atap ótildi.
Belarus Respublikası Milliy Majlisi Respublika Keńesiniń Baslıǵı Natalya Kochanova menen ushırasıwda kóp táreplemeli Ózbekstan-Belarus qatnasıqların jáne de keńeytiw máseleleri kórip shıǵıldı.
Ushırasıw aldında Belarus delegaciyası basshısı Ózbekstan jetekshisine Prezident Aleksandr Lukashenkonıń sálemi hám eń jaqsı tileklerin jetkerdi.
Kóp táreplemeli Ózbekstan-Belarus qatnasıqların jáne de keńeytiw máseleleri kórip shıǵıldı.
Tovar almasıw kólemi jedel artıp atırǵanı, sanaat hám awıl xojalıǵında kooperaciyalıq joybarlar tabıslı ámelge asırılıp atırǵanı, aymaqlar arasındaǵı birge islesiwdiń nátiyjeli bolıp atırǵanı, mádeniyat, bilimlendiriw hám densawlıqtı saqlaw tarawlarındaǵı almasıwlar jedelleskeni qanaatlanıwshılıq penen atap ótildi.
Jedel parlamentleraralıq sóylesiwdi dawam ettiriw, sonıń ishinde joqarı dárejede erisilgen kelisimlerdiń parlamentlik qadaǵalawın támiyinlew hám óz waqtında orınlanıwına járdemlesiw áhmiyetli ekeni atap ótildi.
Ózbekstan Respublikası Prezidenti Shavkat Mirziyoev 7-aprel kúni Parlamentleraralıq awqamnıń 150-Assambleyasına qatnasıw ushın elimizge kelgen Oraylıq Aziya mámleketleri parlamentleri delegaciyalarınıń basshıların qabılladı.
Birgeliktegi ushırasıwda Qazaqstan Respublikası Parlamenti Majlisi Baslıǵı Erlan Koshanov, Qırǵız Respublikası Jogorku Keneshi Toraǵasi Nurlanbek Turǵunbek ulı, Tájikstan Respublikası Majlisi Namoyandagon Baslıǵı Fayzali Idizoda hám Túrkmenstan majlisi Baslıǵı Dunyaguzal Gulmanova qatnastı.
Joqarı mártebeli miymanlar Ózbekstan Respublikası Prezidentine óz mámleketleri jetekshileriniń qızǵın sálemin hám jaqsı tileklerin jetkerdi, regionımızda birinshi márte ótkerilip atırǵan bul xalıqaralıq ilajdıń áhmiyetin ayrıqsha atap ótti.
Tuwısqan mámleketler arasındaǵı doslıq, jaqın qońsıshılıq, strategiyalıq sheriklik hám awqamlaslıq qatnasıqların bunnan bılay da bekkemlew hám rawajlandırıw máseleleri kórip shıǵıldı.
4-aprel kúni Samarqand qalasında bolıp ótken «Oraylıq Aziya – Evropa Awqamı» birinshi sammiti hám Klimat forumınıń unamlı nátiyjeleri joqarı bahalandı.
Joqarı dárejedegi jedel sóylesiwler ayrıqsha qanaatlanıwshılıq penen atap ótildi. Jaqında regionda ótkerilgen ushırasıwlar, sonıń ishinde, shegaralardı delimitaciyalaw máseleleri tolıq tártipke salınǵanı hám Xojend qalasında Ózbekstan, Qırǵızstan hám Tájikstan mámleketlik shegaralarınıń tutas noqatı haqqındaǵı shártnamaǵa qol qoyılǵanı tariyxıy áhmiyetke iye ekeni atap ótildi.
Keyingi jıllarda region mámleketleri arasında tovar almasıwdıń kólemi kóp esege arttı, shegara aldı sawda zonaları shólkemlestirilmekte.
Ekonomikanıń hár qıylı tarmaqlarında, sonıń ishinde, mámleketlerimiz aymaqlarında kooperaciyalıq joybarlar tabıslı ámelge asırılmaqta. Mádeniyat hám bilimlendiriwde ilajlarǵa bay baǵdarlamalar ámelge asırılmaqta.
Ushırasıwda mámleketlerimiz hám xalıqlarımızdı jáne de jaqınlastırıw, birgeliktegi kooperaciyalıq baslamalar hám joybarlardı alǵa qoyıw, aymaqlararalıq baylanıslar hám gumanitarlıq almasıwlardı keńeytiw maqsetinde parlamentleraralıq sóylesiwdi, sonıń ishinde, komitetler dárejesinde bekkemlew áhmiyetli ekenligi atap ótildi.
Túrkiya Respublikası Ullı millet majlisi Baslıǵı Numan Kurtulmush basshılıǵındaǵı delegaciya menen ushırasıw aldında Túrkiya parlamentiniń baslıǵı mámleketimiz basshısına Prezident Rejep Tayyip Erdoǵannıń sálemi hám eń jaqsı tileklerin jetkerdi.
Ózbekstan menen Túrkiya arasındaǵı doslıq hám keń kólemli strategiyalıq sheriklik qatnasıqların bekkemlewdiń áhmiyetli máseleleri kórip shıǵıldı.
Eki tárepleme birge islesiwde joqarı dárejege erisilgeni úlken qanaatlanıwshılıq penen atap ótildi. Óz-ara tovar almasıw hám investiciya kórsetkishleri óspekte, tabıslı birgeliktegi joybarlar hám kárxanalar sanı, tikkeley párwazlar kóbeymekte. Eki mámleket hám xalıqtı jaqınlastırıwǵa qaratılǵan áhmiyetli mádeniy ilajlar ótkerilmekte.
Parlamentleraralıq baylanıslardı jáne de rawajlandırıwǵa, Ózbekstan – Túrkiya sherikliginiń jańa kún tártibin qáliplestiriw, aymaqlararalıq birge islesiwdi jedellestiriwde, sonday-aq, joqarı dárejedegi kelisimlerdiń orınlanıwı ústinen qadaǵalawdı támiyinlewde doslıq toparlarınıń qatnasıwına ayrıqsha itibar qaratıldı.
Pakistan Islam Respublikası Senatı Baslıǵı Yusup Rizo Ǵiloniy basshılıǵındaǵı delegaciya menen ushırasıwda Ózbekstan-Pakistan strategiyalıq sheriklik qatnasıqları izbe-iz rawajlanıp atırǵanı úlken qanaatlanıwshılıq penen atap ótildi.
Ushırasıwda joqarı mártebeli miyman mámleketimiz basshısına Prezident Asif Ali Zardariy hám Bas ministr Shahboz Shariftiń sálemin hám eń jaqsı tileklerin jetkerdi.
Óz-ara sawda kólemi, birgeliktegi kárxanalar hám tikkeley párwazlardıń sanı artpaqta, eki mámleket jetekshi kompaniyalarınıń qatnasıwında biznes forumları hám kórgizbeler turaqlı ótkerilmekte.
Jaqında Ózbekstanǵa ámelge asırılǵan joqarı dárejedegi tariyxıy sapar dawamında erisilgen kelisimlerdiń nátiyjeli orınlanıwın támiyinlewde parlamentlerdiń rolin kúsheytiwge ayrıqsha itibar qaratıldı.
Sawda-ekonomika, investiciya hám transport tarawlarındaǵı áhmiyetli joybar hám baǵdarlamalardı jedellestiriw, sonıń ishinde, Transawǵan jol qurılısın alǵa qoyıw, sonday-aq, aymaqlararalıq birge islesiw hám gumanitarlıq almasıwlardı keńeytiw zárúrligi atap ótildi.
Mámleketimiz basshısı Hindstan Respublikası parlamentiniń tómengi palatası – Lok Sabha Spikeri Om Birla basshılıǵındaǵı delegaciyanı qabılladı.
Ushırasıw basında spiker mámlektimiz basshısına Hindistan Bas ministri Narendra Modidiń sálemin hám eń jıllı tileklerin bildirdi.
Ózbekstan-Hindstan strategiyalıq sheriklik qatnasıqların bunnan bılay da keńeytiw máseleleri kórip shıǵıldı.
Kóp táreplemeli birge islesiw izbe-iz rawajlanıp atırǵanı qanaatlanıwshılıq penen atap ótildi. Keyingi jıllarda tovar almasıwda turaqlı ósim baqlanbaqta, tabıslı kooperaciyalıq joybarlar kóbeymekte, aviaqatnawlar keńeymekte.
Energetika, densawlıqtı saqlaw, farmacevtika, IT, awıl xojalıǵı sıyaqlı tarawlarda joybarlar ámelge asırılmaqta.
Ózbekstanda Hindstannıń 4 universitetiniń filialları jumıs alıp barmaqta.
Sóylesiwde tıǵız parlamentleraralıq almasıwlardı, tarawlıq komitetler dárejesinde jedel baylanıslardı jolǵa qoyıw, doslıq toparları hám jaslar platformaların shólkemlestiriw, sonday-aq, eki mámleket aymaqlarınıń potencialın nátiyjeli iske qosıw zárúrligi atap ótildi.
Bunnan soń Ózbekstan Respublikası Prezidenti Shavkat Mirziyoev arab mámleketleri parlamentleriniń basshıların qabılladı.
Ushırasıwda Arab parlamenti Baslıǵı Muhammad bin Ahmad Al- Yamahiy, Bahrayn parlamenti Wákiller keńesiniń Spikeri Ahmad bin Salmon Al-Musallam, Egipet Wákiller palatasınıń Spikeri Hanafiy Ali Al-Jabaliy, Oman Shwro keńesi Baslıǵı Holid bin Hilol Al-Maavali, Qatar Shwro keńesi Baslıǵı Hasan bin Abdulloh Al-Ǵanim hám Birlesken Arab Ámirlikleri Federal milliy keńesi komitetiniń baslıǵı Ali Rashid Al-Nuaymiy qatnastı.
Arab dúnyası mámleketleri menen kóp táreplemeli qatnasıqlardı, sonıń ishinde, parlamentleraralıq qatnasıqlar arqalı jáne de rawajlandırıw máseleleri kórip shıǵıldı.
Ushırasıw aldında delegaciyalardıń basshıları Ózbekstan jetekshisine óz mámleketleri jetekshileriniń qızǵın sálemi hám eń jaqsı tileklerin jetkerdi.
Keyingi jıllarda Ózbekstan hám arab mámleketleriniń keń kólemli sherikligi jedel rawajlanıp atırǵanın úlken qanaatlanıwshılıq penen atap ótildi.
Joqarı dárejedegi tariyxıy saparlar ámelge asırıldı, óz-ara sóylesiw hám almasıwlar jedel dawam ettirilmekte.
Birlesken Arab Ámirlikleri hám Qatar Mámleketi menen qatnasıqlar strategiyalıq sheriklik dárejesine kóterildi. Saudiya Arabstanı hám Egipet penen keń kólemli birge islesiw jolǵa qoyıldı.
Baxreyn Patshalıǵı hám Oman Patshalıǵı menen hár tárepleme birge islesiw izbe-iz rawajlanbaqta.
Bul mámleketler menen investiciya joybarlarınıń portfeli 50 milliard dollardan arttı. «Jasıl» energetika, ximiya sanaatı, awıl xojalıǵı, IT, transport hám logistika, infrastruktura hám turizm tarawlarında joybarlar ámelge asırılmaqta. 500ge shamalas birgeliktegi kárxana shólkemlestirildi, tikkeley aviaqatnawlardıń sanı háptesine 150 den arttı.
Regionallıq kún tártibindegi, sonıń ishinde, Jaqın Shıǵıstaǵı jaǵdaydı tártipke salıwdıń áhmiyetli máseleleri kórip shıǵıldı.
Bolajaq joqarı dárejedegi ilajlar rejesi, bárinen burın, usı jılı may ayında Samarqand qalasında «Oraylıq Aziya – Arab qoltıǵı arab mámleketleri birge islesiw keńesi» sóylesiwiniń ekinshi sammitin ótkeriw máseleleri kórip shıǵıldı.
Prezident Shavkat Mirziyoev BMSh Bas xatkeriniń balalarǵa zorlıq máseleleri boyınsha arnawlı wákili Najat Maalanı qabılladı.
Joqarı mártebeli miyman mámleketimiz basshısına Birlesken Milletler Shólkeminiń Bas xatkeri Antoniu Guterrishtiń qızǵın sálemin jetkerdi.
BMSh institutları, atap aytqanda, Arnawlı wákil ofisi menen bala huqıqları, erkinlikleri hám nızamlı máplerin qorǵaw boyınsha kóp táreplemeli sheriklikti rawajlandırıw máseleleri kórip shıǵıldı.
Arnawlı wákil Ózbekstan jetekshisiniń balalardı zorlıqtıń barlıq túrlerinen qorǵaw, hayal-qızlar hám balalardı qáwipli aymaqlardan qaytarıw, balalardıń miynetin saplastırıw baǵdarındaǵı nátiyjeli reformaların joqarı bahaladı.
Bala huqıqlarına baylanıslı xalıqaralıq normativlik-huqıqıy hújjetlerdi, balanıń huqıqların qorǵaw boyınsha nızamshılıq hám milliy institutlardıń jumısın jetilistiriw máselelerinde birge islesiwdi rawajlandırıw áhmiyetli ekenligi atap ótildi.
Sonday-aq, Tashkent qalasında balalarǵa bolǵan zorlıqtıń aldın alıw boyınsha regionallıq konferenciya hám BMSh bas rezidenciyasında Ózbekstannıń ámeliy tájiriybesi menen tanısıw boyınsha dógerek sáwbetin ótkeriw máseleleri kórip shıǵıldı.
Soń Ózbekstan Respublikası Prezidenti Shavkat Mirziyoev Parlamentleraralıq Awqamnıń usı abıraylı struktura baslıǵı Tuliya Ekson hám bas xatkeri Martin CHungongtan ibarat delegaciyasın qabılladı.
Parlamentleraralıq Awqamnıń joqarı dárejeli wákilleri mámleketimizdiń basshısın Tashkent qalasında shólkemniń yubiley Assambleyası tabıslı shólkemlestirilgeni hám onıń jalpı májilisinde dástúriy shıǵıp sóylegeni menen qızǵın qutlıqladı.
Bunday keń kólemli forumnıń Ózbekstanda ótkerilip atırǵanı hám alǵa qoyılǵan baslamalar tolıq qollap-quwatlanǵanı Jańa Ózbekstandaǵı artqa qaytpaytuǵın reformalar, ásirese, parlamentarizmdi rawajlandırıw baǵdarındaǵı nátiyjelerdiń xalıqaralıq tán alınıwı atap ótildi.
Awqam menen birge islesiw joqarı dárejege shıǵıp, nátiyjeli túrge engeni qanaatlanıwshılıq penen atap ótildi.
Keyingi jıllarda birgeliktegi háreketler menen Buxara qalasında Turaqlı rawajlanıw maqsetleri boyınsha parlamentleraralıq forum hám Tashkent qalasında parlamentler hayal-qız basshılarınıń 14-sammiti shólkemlestirildi.
Bunnan tısqarı, BMSh Bas Assambleyasınıń Turaqlı rawajlanıw maqsetlerine erisiwde parlamentlerdiń rolin kúsheytiw haqqındaǵı arnawlı rezolyuciyası qabıl etildi.
Sáwbetlesiw waqtında mámleketler hám xalıqlar arasında tınıshlıq hám konstruktivlik sóylesiwdi bekkemlew, «jasıl» rawajlanıw hám jasalma intellekt tarawında nızam dóretiwshiligin keńeytiw, hayal-qızlar hám jaslardı parlament jumısına jáne de kóbirek tartıw boyınsha baǵdarlamalardı ámelge asırıwda parlament diplomatiyasınıń áhmiyeti atap ótildi.
Ushırasıw juwmaǵında Ózbekstan Prezidenti birge islesiwdi rawajlandırıw hám parlament diplomatiyasın nátiyjeli alǵa qoyıwǵa qosqan úlken úlesi ushın Parlamentleraralıq Awqamnıń bas xatkeri Martin CHungongti «Dwstlik» ordeni menen sıylıqladı.
Ózbekstan 2017-jılı Awqam jumısındaǵı qatnasıwın qayta tilep, búgingi kúnde onıń atqarıw strukturalarında tolıq qatnasıp atırǵanın atap ótiw zárúr.

ÓzA