Ózbekstan mámleketlik denetárbiyası hám sport universiteti Nókis filialında grek-rim gúresi boyınsha eki márte Aziya chempionı, elimizdiń maqtanıshı Jalǵasbay Berdimuratov hám onıń treneri Rustam Ernazarov penen respublikamız jasları hám ǵalaba xabar quralları wákilleri ushırasıw ótkerdi.

Ushırasıwda Jalǵasbay Berdimuratov óziniń basıp ótken ómir jolı, qatnasqan jarısları, tayarlıǵı, hár kúni isleytuǵın shınıǵıwları, jeńiske erisip xalıqaralıq arenada elimiz bayraǵın kóklerde jelbiretip, elimiz gimnin jańlatıwdıń zawqı qanshelli maqtanıshlı ekenligi haqqında aytıp berdi.
Sonday-aq, keshede tájiriybeli trener Rustam Ernazarov ta Jalǵasbaydıń búgingidey dárejege jetiw jolındaǵı mashaqatlı miynetlerin, tınbay izleniwleri hám pidayılıǵın ayrıqsha tilge alıp, trenerlerge jas palwanlar menen birge islesiw hám onı tárbiyalaw usılları haqqında keń túrde maǵlıwmatlar berdi.
-Jalǵasbaydı maǵan shákirtlikke 7-klasında alıp keldi,-deydi Rustam Ernazarov.-Onıń menen sálemlesken gezde-aq, qolınıń kúshli ekenligin sezdim. Sońınan oǵan bir neshe shınıǵıwlar isletip kórdim. Aytqanımdı aytqanday durıs orınladı hám ol Nókis Olimpiya rezervleri kolledjine oqıwǵa qabıllandı. Sol waqıttan baslap, ol barlıq qıyın shınıǵıwlardı erinbesten orınlap, dáslep Qaraqalpaqstan, sońınan Ózbekstan hám Aziya chempionı bolıwǵa eristi. Jáhán chempionatında qola medalın qolǵa kirgizdi. 2021-jıldan soń onıń karerasında azı-kem tómenlew boldı. Biraq, ol óziniń sabırlılıǵın kórsetip, jaqında Iordaniya paytaxtı Amman qalasında ótkerilgen Aziya chempionatında altın medaldı qolǵa kirgiziwge miyasar boldı. Men onıń bul jetiskenliginen oǵada quwanıshlıman hám aldaǵı waqıtları da úlken jeńislerdi qolǵa kirgiziwine tileklespen. Ushırasıw dawamında jaslar hám ǵalaba xabar wákilleri ózleriniń qızıqtırǵan sorawlarına juwap aldı.
Ilaj sońında Aziya chempionınıń jetiskenlikleri boyınsha soraw-juwap viktorinasi ótkerilip, jeńimpazlar Jalǵasbay Berdimuratov hám Rustam Ernazarovlar tárepinen estelik sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı