9-aprel – Qaraqalpaqstan Respublikası Konstituciyası qabıl etilgen kún

Berdaq atındaǵı Qaraqalpaq mámleketlik universitetinde Qaraqalpaqstan Respublikası Konstituciyasınıń qabıl etilgenliginiń 32 jıllıǵı múnásibeti menen saltanatlı ilaj bolıp ótti.
Onda Qaraqalpaqstan Respublikası Konstituciyalıq baqlaw komitetiniń baslıǵı P.Aytniyazov, Qaraqalpaqstan Respublikası Prokurorınıń orınbasarı E.Qayıpbergenov, Jınayat isleri boyınsha Xojeli rayonı sudınıń baslıǵı S.Dawletmuratov hám universitet professor-oqıtıwshıları, student-jaslar qatnastı.
Ilajdı universitettiń ilimiy isler hám innovaciyalar boyınsha prorektorı I.Turdımambetov basqarıp bardı.
Ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Ilajda sózge shıqqanlar, elimizde ámelge asırılıp atırǵan reformalar, jańalanıwlar haqqında keń túrde maǵlıwmatlar berip, Ózbekstannıń hám Qaraqalpaqstannıń jámiyetlik-siyasiy rawajlanıwında Konstituciyanıń tiykarǵı principleri, yaǵnıy, nızam ústinligi, insan huqıqlarınıń qorǵalıwı, ádillik hám erkinliktiń támiyinleniwi áhmiyetli rol atqarıp atırǵanlıǵın atap ótti.
Haqıyqatında da, Konstituciya mámlekettiń ishki hám sırtqı siyasatın belgilep beriwshi huqıqıy tiykar bolıp esaplanadı. Tikkeley usı hújjet arqalı elimizde barlıq puqaralardıń teń huqıqlılıǵı, erkinligi hám ádalatlı jámiyet qurıw maqsetleri ámelge asırılmaqta.
Mámlekettiń tiykarǵı nızamı, ásirese, demokratiyalıq huqıqıy mámleketti qurıw jolında, puqaralıq jámiyetiniń qáliplesiwinde úlken áhmiyetke iye. Konstituciyanıń xalıqaralıq standartlarǵa muwapıqlıǵı hám onıń barlıq puqaralardı teń huqıqlı etiwge, barlıq tarawlarda ádillikti támiyinlewge qaratılǵan principleri búgingi kúnde mámleketti turaqlı rawajlandırıwǵa imkaniyat jaratpaqta.
Ilajda, Konstituciyanıń barlıq puqaralar ushın teńdey imkaniyatlar jaratıwda, olardıń huqıqların qorǵawda hám mámleketlik basqarıwda qatnasıw imkaniyatların keńeytiwde áhmiyetli rol atqarǵanı atap ótildi.
Atap ótilgenindey, bul ilajdı shólkemlestiriwden maqset tek ǵana Qaraqalpaqstan Respublikası Konstituciyasınıń 32 jıllıǵın belgilew emes, al onıń mazmunı hám principlerin keńirek túsindiriw, hár bir puqaranıń huqıqları menen erkinliklerin qorǵaw jolında jáne de kóbirek jumıslar islewge iytermelew bolıp tabıladı.
Ilajda, Konstituciyanıń qabıl etilgen kúnin hár jılı keńnen belgilew, ásirese, jaslarımızdıń siyasiy, huqıqıy hám ruwxıy ósiwine xızmet etetuǵın áhmiyetli hújjet sıpatında jáne de keńnen úgit-násiyatlaw zárúrligi atap ótildi.
Álbette, elimizde júz berip atırǵan jańalanıwlar demokratiyalıq hám huqıqıy mámleket qurıw, puqaralıq jámiyetin qáliplestiriw baǵdarındaǵı barlıq tabıslarımızdıń barlıǵı Konstituciyada belgilengen principlerdiń turmısqa tolıq engiziliwi menen baylanıslı.

Qaraqalpaqstan xabar agentligi