Senattıń besinshi jalpı májilisinde «Ózbekstan Respublikası menen Qırǵız Respublikası arasında erkinen ayırılǵan shaxslardı jazanı ótewdi dawam ettiriw ushın tapsırıw haqqındaǵı Shártnamanı (Tashkent, 2024-jıl 18-iyul) ratifikaciyalaw haqqında»ǵı nızam kórip shıǵıldı.

– Shártnamada jaza múddetin ótep atırǵan qamaqtaǵılardı húkimdi orınlaw ushın óz mámleketine tapsırıw tiykarları, shártleri hám tártipleri anıq kórsetip ótilgen,-dedi Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń aǵzası Jamila Bobonazarova. – Bul hújjette qamaqtaǵını tapsırıwǵa baylanıslı qárejetler, kelispewshiliklerdi sheshiw, eki tárepleme baylanıs tilleri, Shártnamaǵa ózgeris kirgiziw hám onıń kúshke kiriwi sıyaqlı áhmiyetli máseleler orın alǵan. Shártnamada Ózbekstan hám Qırǵızstan bas prokuraturaları táreplerdiń oraylıq uyımları etip belgilengen.
Senator Gulnora Marufovanıń atap ótiwinshe, bul Shártnamada Tárepler óz-ara shártlerge muwapıq bir-biriniń sorawı boyınsha húkim shıǵarıwshı Tárep aymaǵında jınayat islegeni ushın jazanı orınlaw mákemelerinde erkinen ayırıw túrindegi jazanı ótip atırǵan shaxslardı puqaralıǵı bolǵan Tárepke ótkeriw tártipleriniń belgileniwi maqsetke muwapıq bolmaqta. Sebebi, jınayat islew aqıbetinde erkinen ayırılǵan sırt el puqaralarına belgilengen jazanı óz mámleketinde ótewi ushın imkaniyat jaratılıwı olardı qayta tárbiyalaw hám sociallıq beyimlestiriw procesin jedellestiredi.
Senator Wktamjan Oxunovtıń atap ótiwinshe, Shártnama adamgershilik principlerine tiykarlanǵan áhmiyetli hújjet bolıp esaplanadı. Bul hújjette qamaqtaǵını tapsırıwǵa baylanıslı qárejetler, kelispewshiliklerdi sheshiw, eki tárepleme baylanıs tilleri, shártnamaǵa ózgeris kirgiziw hám kúshke kiriwi sıyaqlı áhmiyetli máseleler orın alǵan.
Senatorlar maqullaǵan nızam qamaqtaǵılardıń huqıqların támiyinlewge xızmet etedi. Olardıń shańaraqlıq qatnasıqlarına unamlı tásir etedi hám jámiyetlik turmısqa beyimlesiwin tezlestiredi.

Norgul Abduraimova,
Nosir Haydarov (súwret),
ÓzA