Ózbekstanda puqaralardan jumısqa kiriwde pasport, miynet hám pensiya dáptershesi qabıl etilmeydi.
Bul, keshe ǵana qabıl etilgen Miynet kodeksine kirgizilgen ózgerisler hám qosımshalar haqqındaǵı nızamda názerde tutılǵan.
Nızam menen Miynet kodeksine «Birden-bir milliy miynet sisteması» uyımlararalıq programmalıq-apparat kompleksinde elektron túrdegi miynet shártnamasın rásmiylestiriw tártibin engiziw, miynet haqı saqlanbaytuǵın dem alıs dawamlılıǵın belgilew tártibin hám xızmetkerdiń miynet haqısın esaplaw tártibin ózgertiwdi názerde tutıwshı qosımshalar hám ózgerisler kirgizilmekte.
Sonday-aq, «Bilimlendiriw haqqında»ǵı nızamǵa muwapıq xızmetkerler keshki yamasa sırtqı tálim túrinde oqıwı múmkin bolǵan bilimlendiriw shólkemleriniń túrlerin anıqlastırıwshı ózgerisler kirgizilmekte. Kirgizilip atırǵan ózgerislerge bola, mámleketlik uyımlar hám shólkemler jumısqa qabıllaw waqtında jumısqa kirip atırǵan shaxstıń pasportına yamasa identifikaciyalawshı ID-kartasına, miynet dáptershesine baylanıslı maǵlıwmatlardı erkin túrde, sonıń ishinde, málimleme sistemalarındaǵı uyımlararalıq integraciyalasıw platformaları arqalı sorap aladı. Mámleketlik puqaralıq xızmetkerlerdiń miynetke baylanıslı qatnasıqlarına baylanıslı miynet haqqındaǵı nızamshılıqtıń ámel etiwi «Mámleketlik puqaralıq xızmeti haqqında»ǵı nızam menen tártipke salınbaǵan bólegi boyınsha qollanılatuǵını belgilendi.
Hújjet rásmiy járiyalanǵan kúnnen baslap kúshke kiredi.

Sh.Mamaturopova, ÓzA