Sırtqı isler ministriniń orınbasarı Ilham Haydarov, «Ózeltexsanaat» associaciyasınıń baslıǵı Mirziyod Yunusov hám Malayziya Yarımótkizgishler sanaatı associaciyası (MSIA) direktorı Еndryu Chan arasında ushırasıw ótkerildi.

Onda eki mámleket arasındaǵı texnologiyalıq birge islesiwdi bekkemlewge qaratılǵan máselelerdi dodaladı.
Atap ótilgenindey, «Ózeltexsanaat» associaciyası elektron komponentler hám mikrochipler islep shıǵarıw tarawında dúnya júzilik kólemdegi iri «Intel», AMD, «Infineon» sıyaqlı texnologiya kompaniyaları menen birge islesip kelmekte. Bul ushırasıw da shólkem ushın jańa birge islesiw imkaniyatların ashıp beriwge xızmet etedi.
Ushırasıwda Malayziya Yarımótkizgishler sanaatı associaciyasınıń jumısı haqqında da hár tárepleme maǵlıwmat berildi. Oǵan bola, MSIA mámlekettegi elektronika hám yarımótkizgishler sanaatın rawajlandırıwǵa qaratılǵan tiykarǵı shólkemlerden biri esaplanadı. Ol Malayziyadaǵı júzlegen jetekshi kompaniyalardı birlestirip, global bazar menen integraciyanı támiyinleydi.
Associaciyanıń málimleme xızmetine bola, MSIA jumısınıń tiykarǵı baǵdarları mikrochipler hám elektronika sanaatın rawajlandırıw, innovaciyalıq texnologiyalardı engiziw hám kadrlar tayarlaw, sonday-aq, húkimet hám jeke sektor arasındaǵı muwapıqlastırıw jumısları sıyaqlı máselelerdi óz ishine aladı.
Sóylesiw juwmaǵında tárepler texnologiyalıq birge islesiwdi keńeytiw hám jańa joybarlardı iske túsiriw, eki mámleket arasında baylanıslardı bunnan bılay da bekkemlew ilajların kóriwge kelisip aldı.

N.Ziyodullaeva,
ÓzAnıń xabarshısı