Хитойнинг «Holly Technology Ltd.» компанияси ҳудудий директори Жиан Кан ва маркетинг бўлими бошлиғи Ченг Жиан Фенг Тахтакўпир туманида бўлиб, Даўқара ҚФЙ ҳудудидаги Бўрчитов тепасига 2026-2027 йилларда қуввати 50 МВт бўлган шамол электр станциясини қуриш лойиҳасини амалга ошириш имкониятларини ўрганган эди. Ташриф давомида ҳудудда шамол кучи, тезлиги, давомийлиги ва бошқа табиий кўрсаткичлар бўйича ўрганиш ишлари олиб борилди.

Компаниянинг бугунги кунга қадар ўтказган изланишлари ва дастлабки хулосалари асосида лойиҳа учун мос келадиган шамол генераторларининг тури, ўлчами ва техник кўрсаткичларини янада чуқурроқ ўрганиш мақсадида Тахтакўпир тумани раҳбарлари ва мутахассислари Хитойга таклиф этилди.

Хизмат сафари давомида туман ҳокими Жамбул Адилов Хитой компаниялари билан музокаралар ўтказиб, ҳудудда шамол электр станциясини қуриш бўйича келишувларга эришиш, шунингдек, туман иқтисодиётига хорижий инвестиция киритиш, , замонавий технологияларни жорий этиш ҳамда қишлоқ хўжалиги ва ишлаб чиқариш учун зарур техникаларни импорт қилиш масалаларини муҳокама қилиш режалаштирилган.

Ушбу ташриф натижасида эришилган келишувлар Тахтакўпир туманида «яшил энергетика» лойиҳаларини ривожлантириш, янги иш ўринлари яратиш ва ҳудуднинг иқтисодий салоҳиятини янада оширишга хизмат қилиши кутилмоқда.

Қорақалпоғистон ахборот агентлиги