Керги – тўртбурчак шаклидаги жун ипдан тукли усулда тўқилган астарли халта. У қора уйнинг тўрига – чап томондаги керагага қистириб қўйилган ва идиш-товоқларни солиб қўйиш учун фойдаланилган. Олд томони кўпинча «тароқ» ва «муйиз» нақшлари билан тўқилган. Четлари (тўр, тугма ва попук усулида) шокилали. Астар читдан ёки бўздан тикилган.

Марказий қисмига комбинацияланган тўқимачилик намунасида шохсимон шаклларга эга бўлган учта йирик ромб, уларнинг ўртасига ҳар томонга йўналган тўртта илгак чизилган.

Қора уйнинг ичига қистириб қўйиш учун икки томонига узун тўқима иплар бирлаштирилган. Уларга «бахт тугунлари» ва беш-олти дона попуклар ёпиштирилган.

Қорақалпоқ халқи қадимдан тўқима, ўрилган буюмлар хонадонни турли зарарлардан, кўз-тилдан ҳимоя қилишига ишонган. Шу қаторда ранг-баранг иплар билан ишлов берилган тугунли, попукли, қуроқли буюмларни уй-рўзғорида фойдаланган.

Қорақалпоғистон ахборот агентлиги