Кувайт давлатида қиличбозлик бўйича ўтаётган Осиё чемпионатининг ўсмирлар ўртасидаги беллашувларда қиличбозликнинг учта қурол тури бўйича жамоавий мусобақа бўлиб ўтди.

Сабля йўналиши бўйича Карина Қурбонова, Наргиза Утебаева, Севара Ғаниева ва Ойгул Шамуратовадан иборат Ўзбекистон қизлар терма жамоаси 12 та терма жамоа орасида кумуш медални қўлга киритди.

Шунингдек, сабля йўналиши бўйича ўтаётган яккалик баҳсларида мамлакатимиз шарафини ҳимоя қилган Муса Аймуратов олтин медаль учун ўтган беллашувда хитойлик Вун Тез Вонгни 15:8 ҳисобида енгди ҳамда Осиёда тенгсиз эканини исботлади. Ушбу йўналишда иштирок этган яна бир вакилимиз Исломбек Абдазов бронза медали билан тақдирланди.

Маълумот ўрнида: Осиё биринчилигининг кадетлар ёш тоифасида ташкил этилган қиличбозликнинг сабля йўналиши бўйича ўтган беллашувларда 16 та терма жамоа орасида Ўзбекистон ўғил болалар терма жамоаси кумуш медалга сазовор бўлган эди.

Жавоҳир Тошхўжаев, ЎзА