Ўзбекистон халқаро бизнес учун жозибадор манзилга айланиб, йирик компаниялар эътиборини тортиб, турли соҳаларда ҳамкорлик имкониятларини кенгайтирмоқда. Хорижлик ишбилармонларнинг юртимизга ташриф буюриши ва маҳаллий тўқимачилик корхоналарининг фаолиятини ўрганиши бунинг ёрқин мисолидир.

Яқинда Европанинг “ARTIFEX CO.Ltd” компанияси вакили Вольф-Дитер Ланг маҳаллий тўқимачилик корхоналари билан ҳамкорлик имкониятларини ўрганиш мақсадида Ўзбекистонга ташриф буюрди.

Меҳмонлар “Ўзтўқимачиликсаноат” уюшмаси кўмагида 15 дан ортиқ йирик корхоналар хусусан, “IDEAL”, “MoltoCaldo”, “ADIM”, “FAZMAN” каби брендлар ҳамда “Mustang Textile”, “Sadokat Sanoat Service”, “Ёзвон Textile”, “Amira Textile” каби ишлаб чиқарувчиларнинг иш жараёни билан яқиндан танишди.

“ARTIFEX CO.Ltd” компанияси вакили Ўзбекистон корхоналарининг юқори салоҳиятини эътироф этиб, узоқ муддатли ҳамкорлик ўрнатишдан манфаатдорлигини билдирди. Шу билан бирга, томонлар қўшма лойиҳалар, технологиялар алмашинуви ва янги дизайн ишланмаларини муҳокама қилди.

“Ўзтўқимачиликсаноат” уюшмаси халқаро брендларни жалб қилиш бўлими бошлиғи Абдулазиз Абдураҳимовнинг таъкидлашича, “ARTIFEX CO.Ltd” компанияси Ўзбекистон корхоналарига узоқ муддатли буюртмалар бериш имкониятини кўриб чиқмоқда.

– Ушбу ташриф Европа мода бозорида Ўзбекистоннинг тўқимачилик маҳсулотларига бўлган қизиқишнинг ортиб бораётганини кўрсатади. Ҳамкорлик натижасида маҳаллий ишлаб чиқарувчилар халқаро бозорга чиқиш имкониятига эга бўлиб, юқори сифатли эксклюзив коллекциялар яратишлари кўзда тутилган. Етакчи брендлар билан шериклик Ўзбекистоннинг тўқимачилик саноатини янги босқичга олиб чиқиб, мамлакатни халқаро мода харитасида янада мустаҳкам ўрин эгаллашини таъминлаши мумкин, – деди А.Абдураҳимов.

Н.Зиёдуллаева, ЎзА