Ózbekstan xalıqaralıq biznes ushın tartımlı mánzilge aylanıp, iri kompaniyalardıń itibarın tartıp, túrli tarawlarda birge islesiw imkaniyatların keńeytpekte. Sırt el isbilermenleriniń elimizge keliwi hám jergilikli toqımashılıq kárxanalarınıń jumısın úyreniwi onıń ayqın mısalı bolıp esaplanadı.
Jaqında Evropanıń «ARTIFEX CO.Ltd» kompaniyasınıń wákili Volf-Diter Lang jergilikli toqımashılıq kárxanaları menen birge islesiw imkaniyatların úyreniw maqsetinde Ózbekstanǵa keldi.
Miymanlar «Óztoqımashılıqsanaat» associaciyası járdeminde 15 ten aslam iri kárxanalar, atap aytqanda, “IDEAL”, “MoltoCaldo”, “ADIM”, “FAZMAN” sıyaqlı brendler hám “Mustang Textile”, “Sadokat Sanoat Service”, “Yozvon Textile”, “Amira Textile” sıyaqlı islep shıǵarıwshılardıń jumıs procesi menen jaqınnan tanıstı.
“ARTIFEX CO.Ltd” kompaniyasınıń wákili Ózbekstan kárxanalarınıń joqarı potencialın atap ótip, uzaq múddetli birge islesiw ornatıwdan mápdar ekenligin bildirdi. Sonıń menen birge, tárepler birgeliktegi joybarlar, texnologiyalardıń almasıwı hám jańa dizayn qollanbaların dodaladı.
«Óztoqımashılıqsanaat» associaiciyası xalıqaralıq brendlerdi tartıw bólimi baslıǵı Abdulaziz Abdurahimovtıń atap ótiwinshe, “ARTIFEX CO.Ltd” kompaniyası Ózbekstan kárxanalarına uzaq múddetli buyırtpalar beriw imkaniyatın kórip shıqpaqta.
-Bul sapar etiw Evropa moda bazarında Ózbekstannıń toqımashılıq ónimlerine bolǵan qızıǵıwshılıqtıń artıp baratırǵanın kórsetedi. Birge islesiw nátiyjesinde jergilikli islep shıǵarıwshılar xalıqaralıq bazarǵa shıǵıw imkaniyatına iye bolıp, joqarı sapalı eksklyuziv kollekciyalar jaratıwı názerde tutılǵan. Jetekshi brendler menen sheriklik Ózbekstannıń toqımashılıq sanaatın jańa basqıshqa alıp shıǵıp, mámlekettiń xalıqaralıq moda kartasında jáne de bekkem orın iyelewin támiyinlewi múmkin, – dedi A.Abduraximov.

N.Ziyodullaeva, ÓzA