Таиланднинг Пхитсанулок провинциясида ўтказилаётган велошоссе бўйича Осиё чемпионати доирасида аёллар ўртасидаги индивидуал вақт пойгаси бўлиб ўтди.

Унда Ўзбекистон миллий терма жамоаси аъзоси, тажрибали велоспортчимиз Янина Кускова муносиб қатнашди. Янина чемпионатнинг мазкур йўналишида белгиланган масофани 42 дақиқа 50.566 сонияда босиб ўтди ва олтин медалга эга чиқди. Унинг ортидан маррага Сафия Ал Саех (БАА) ва Тсуяка Учино (Япония) етиб келди.

Шунингдек, велошоссе бўйича Осиё чемпионати доирасида ўтказилган U23 қизлар ўртасидаги индивидуал вақт пойгасида Ўзбекистон миллий терма жамоаси аъзоси Асал Ризаева якунда совриндорлар қаторидан жой олди.

Шундай қилиб, делегациямизнинг мусобақа доирасида қўлга киритган медаллари сони  3 та олтин ва 1 та бронзага етди.

Жавоҳир Тошхўжаев,

ЎзА