Ўзбекистон делегациясининг Малайзияга амалга ошираётган хизмат сафари доирасида Коррупцияга қарши курашиш агентлиги директори Акмал Бурхоновнинг Малайзия Ҳалоллик институти Бош ижрочи директори Раҳмон бин Мохд Дин билан икки томонлама учрашуви бўлиб ўтди.

Учрашув кун тартибига давлат хизматида ҳалоллик стандартларининг жорий этилиши ва Малайзия тажрибасини Ўзбекистонда татбиқ этиш масалалари киритилди.

Малайзияда жорий этилган “Давлат хизматчисининг ҳалоллик профили”, “Ҳалолликни баҳолаш тести” ҳамда “Корпоратив ҳалоллик тизими бошқаруви” лойиҳалари тўғрисида батафсил маълумот берилди.

Маълумот учун: “Давлат хизматчисининг ҳалоллик профили” сунъий интеллект ёрдамида қўлланиладиган амалиёт бўлиб, у барча давлат хизматчилари учун жорий этилган.

Ўз ўрнида, Агентлик директори мазкур йўналишда давлат органларида коррупциявий хавф-хатарларни камайтириш ва идоралар фаолиятини рейтинг баҳолаш тизими мавжудлигини айтиб ўтди.

Учрашув доирасида томонлар Малайзиянинг ҳалолликни баҳолаш бўйича илғор тажрибасини Ўзбекистонда жорий этиш масаласида яқиндан ҳамкорлик қилишга келишиб олди. Шунингдек, икки идора ўртасида ҳамкорликка оид ҳужжат ишлаб чиқилиши ва имзоланиши белгиланди.

–Бугун биз Ўзбекистон делегацияси, айнан Коррупцияга қарши курашиш агентлиги раҳбари ва вакиллари билан ҳамкорлик масалаларига бағишланган муҳокамалар ўтказдик, – деди Малайзия Ҳалоллик институти Ижрочи директори Раҳмон бин Мохд Дин. – Унда Ҳалоллик институти томонидан юртимизда татбиқ этилган ҳалоллик воситалари, жумладан, ҳалолликни баҳолаш воситаларини Ўзбекистонда ҳам жорий этиш бўйича ҳамкорликни йўлга қўямиз. Умид қиламанки, ўтказилган учрашувимиз келгусида икки идора ўртасида ҳамкорлик келишувларининг имзоланишига ва яқиндан ҳамкорлик ришталарининг ўрнатилишига замин яратади.

Н.Абдураимова,

ЎзА