Жиззах вилоятида шахмат бўйича 8, 10 ва 12 ёшгача бўлган ўғил болалар ва қизлар ўртасидаги рапида, стандарт йўналишлари ҳамда блиц баҳслари бўйича Ўзбекистон чемпионати бўлиб ўтди.

Унда 8 ёшгача бўлган қизлар ўртасида иштирок этган Тахиатош тумани спорт мактабининг тарбияланувчиси Ларина Зарина рақибларига имконият қолдирмай, олтин медални ўз ҳисобига ёзиб қўйди. У шахматнинг стандарт туридан муддатидан олдин мамлакат чемпиони унвонига эришиб, жаҳон чемпионатига йўлланмани қўлга киритган эди. Шунингдек, ушбу чемпионат баҳсларида шахматнинг рапида йўналиши бўйича бронза медалини қўлга киритди.

Шу асосда ҳамюртимиз жаҳон чемпионатида шахматнинг 3 та йўналиши бўйича иштирок этадиган бўлди.

Довуд Абибуллаев, ЎзА мухбири