2022 ва 2023 йилги футбол мавсумларида “Динамо» Батуми сафида мамлакат тўпурари бўлган Жовиньо Фламарион Тошкентнинг “Пахтакор” клуби билан шартнома имзолади.

Бразилиялик Фламарион Грузия чемпионатида 139 та ўйинда майдонга тушиб, 59 та голни ўз ҳисобига ёзиб қўйган футболчи ҳисобланади.

Ушбу футболчи 2020-2021 йил давомида Россиянинг “Ротор” клуби шарафини ҳимоя қилган. 20 та ўйин ўтказиб, 4 та голга муаллифлик қилган.

Ҳозирда Франциянинг “Валансьен” клубида фаолият юритаётган Фламарион шартнома имзолангач ўз фикрлари билан ўртоқлашди. Ҳамдўстлик мамлакатлари чемпионатлари унга бегона эмаслигини, Грузия чемпионатида эришган натижаларини «Пахтакор» сафида ҳам такрорлаш ниятида эканини билдирган.

Айтиш лозим, Жовиньо Фламарион «Пахтакор» билан шартномага имзо чеккан тўртинчи хорижлик футболчи ҳисобланади.

Эслатиб ўтамиз, “Пахтакор” жамоаси айни пайтда Туркиянинг Анталия шаҳрида ўтказилаётган ўқув-машғулот йиғинида қатнашмоқда. Мазкур машғулотлар январь ойининг сўнгги кунларига қадар давом этади.

Т.Рўзиев,

ЎзА