Нукус туманида Қорақалпоғистон Республикаси Ўсимликлар карантини ва ҳимояси агентлиги томонидан “Юртимизда қишлоқ хўжалиги маҳсулотларининг экспорт салоҳиятини ошириш истиқболлари” мавзусида экспортчи корхона вакиллари ва тадбиркорлар учун очиқ мулоқот ўтказилди.
Унда соҳа вакиллари, қишлоқ хўжалиги маҳсулотлари экспорти билан шуғулланувчи корхона раҳбарлари, деҳқон-фермерлар ва тадбиркорлар иштирок этди.
Тадбирни ўтказишдан асосий мақсад, қишлоқ хўжалиги маҳсулотларини экспорт қилувчи тадбиркорлик субъектларини ҳукуматимиз томонидан белгилаб берилган имтиёзлар ва қулайликлар билан таништириш, муаммо ва тўсиқларни аниқлаш ҳамда ҳал қилиш, уларнинг таклиф ва тавсияларини эшитиш, шу билан бирга, Ўзбекистон Республикаси Президентининг “Ўзбекистон Республикаси Президентининг қишлоқ хўжалиги ва озиқ-овқат маҳсулотларини етиштирувчи, ишлаб чиқарувчи ва уларни экспорт қилувчи тадбиркорлар билан ўтказилган мулоқотида белгиланган вазифаларни амалга ошириш чора-тадбирлари тўғрисида”ги ва Вазирлар Маҳкамасининг “Республикада мева-сабзавот маҳсулотлари экспортини тартибга солиш чора-тадбирлари тўғрисида”ги қарорларининг мазмун-моҳиятини тушунтиришдан иборат.
Тадбирда Ўзбекистон Республикаси Ўсимликлар карантини ва ҳимояси агентлиги директори ўринбосари Улуғбек Юнусов ва бошқалар сўзга чиқиб, мазкур қарорларда белгиланган мева-сабзавот маҳсулотларининг экспорт нархларини сунъий пасайтириб кўрсатиш ҳолатларининг олдини олиш, мева-сабзавот маҳсулотларини етиштириш ҳамда уларни экспорт қилишда Ўсимликлар карантини ва ҳимояси агентлигининг “Agroko‘makchi” мобил иловасида яратилган қулайликлар ҳамда ундан фойдаланиш тўғрисида маълумотлар берилди. Назорат органларининг мутахассис ходимлари томонидан мева-сабзавот ва озиқ-овқат маҳсулотларини экспорт қилишдаги талаблар ўз йўналишлари бўйича тушунтирилди.
Экспортёрлар томонидан мева-сабзавот ва озиқ-овқат маҳсулотларини экспорт қилишдаги муаммолари эшитилиб, соҳа мутахассислари томонидан ўз йўналишлари бўйича берилган саволларга жавоб берилди ҳамда қўшимча тавсиялар берилди.
Шу мавзудаги семинар Тўрткўл туманида ҳам бўлиб ўтди.
Довуд Абибуллаев,
Мақсад Ҳабибуллаев (сурат), ЎзА