Черногориянинг Будва шаҳрида бокс бўйича ёшлар ўртасида ўтаётган жаҳон чемпионатида Ўзбекистон терма жамоасининг 13 нафар вакили чорак финал йўлланмасини қўлга киритди.
Жумладан, ҳамюртимиз Сайфиддин Собиров -48 кг. вазн тоифасида мексикалик Владимир Валдезни 4:1 ҳисобида мағлубиятга учратган бўлса, -54 кг. вазндаги чарм қўлқоп устамиз Собиржон Тастанов тожикистонлик Анушервон Фазиловга ҳеч қандай имконият қолдирмади.
Вазни 75 килограммгача бўлган боксчилар ўртасида мамлакатимиз шарафини ҳимоя қилаётган Жафарбек Шахбозов литвалик Василиаускас Довидасни биринчи раунддаёқ техник нокаутга учратиб, чорак финалга йўл олди. -63,5 кг. вазнда Абдулазиз Жўрақулов туркиялик Рефик Картални 5:0 ҳисобида мағлуб этди. Акбар Аҳмадов -67 кг. вазнда хорватиялик Марижа Берендга қарши рингга кўтарилиб, 3 раундда техник нокаут эвазига зафар қучди.
Чемпионат давомида -57 килограмлик боксчилар ўртасида мамлакатимиз шарафини ҳимоя қилган Самандар Олимов чорак финал остонасида болгариялик Ангел Димитровни таслим этди. Вазни -71 кг. бўлган Муҳаммадазизбек Исмоилов ўзининг кучли ва аниқ зарбалари билан колумбиялик Хуан Пабло Пранкони биринчи раунддаёқ техник нокаутга учратди. Нодирбек Аллаберганов ҳам -60 кг. вазндаги рақиби Тринидад ва Тобаго боксчиси Дарнелл Синасвеени иккинчи раундда техник нокаутга учратди.
Шунингдек, ўз вазнларида Жавоҳир Меҳриддинов туркиялик Мерт Айбуға, Ҳалимжон Маъмасолиев арманистонлик Давит Симонянни мағлуб этди. Афсуски, Абдулазиз Абдуназаров ўз вазнида ҳакамларнинг қарорларига кўра 3:2 ҳисобида россиялик Анатоли Ребедиукга имкониятни бой бериб қўйди.
Қизлар баҳсида Феруза Шарипова конголик Керена Пхобани, Зилолахон Юсуфова хитойлик Қиаохиан Хини, Жасмин Тоҳирова россиялик Дариа Зрианина ва марокашлик Ҳадижа Баргачни енгди.
Ҳа, бугунги ёшларимиз ҳар қандай соҳада аниқроқ айтадиган бўлсак, спорт соҳасида дунё мамлакатларини ўз муваффақиятлари билан ҳайратга солмоқда. Умид қиламизки, Будва шаҳрида бокс бўйича ёшлар ўртасида ўтаётган жаҳон чемпионатида ҳам ёш боксчиларимиз улкан зафарлар билан юртимизга қайтади.
Маълумот ўрнида: 29-30 октябрь кунлари жаҳон чемпионати доирасида чорак финал баҳслари бўлиб ўтади.
Жавоҳир Тошхўжаев, ЎзА