Chernogoriyaning Budva shahrida boks bo‘yicha yoshlar o‘rtasida o‘tayotgan jahon chempionatida O‘zbekiston terma jamoasining 13 nafar vakili chorak final yo‘llanmasini qo‘lga kiritdi.
Jumladan, hamyurtimiz Sayfiddin Sobirov -48 kg. vazn toifasida meksikalik Vladimir Valdezni 4:1 hisobida mag‘lubiyatga uchratgan bo‘lsa, -54 kg. vazndagi charm qo‘lqop ustamiz Sobirjon Tastanov tojikistonlik Anushervon Fazilovga hech qanday imkoniyat qoldirmadi.
Vazni 75 kilogrammgacha bo‘lgan bokschilar o‘rtasida mamlakatimiz sharafini himoya qilayotgan Jafarbek Shaxbozov litvalik Vasiliauskas Dovidasni birinchi raunddayoq texnik nokautga uchratib, chorak finalga yo‘l oldi. -63,5 kg. vaznda Abdulaziz Jo‘raqulov turkiyalik Refik Kartalni 5:0 hisobida mag‘lub etdi. Akbar Ahmadov -67 kg. vaznda xorvatiyalik Marija Berendga qarshi ringga ko‘tarilib, 3 raundda texnik nokaut evaziga zafar quchdi.
Chempionat davomida -57 kilogramlik bokschilar o‘rtasida mamlakatimiz sharafini himoya qilgan Samandar Olimov chorak final ostonasida bolgariyalik Angel Dimitrovni taslim etdi. Vazni -71 kg. bo‘lgan Muhammadazizbek Ismoilov o‘zining kuchli va aniq zarbalari bilan kolumbiyalik Xuan Pablo Prankoni birinchi raunddayoq texnik nokautga uchratdi. Nodirbek Allaberganov ham -60 kg. vazndagi raqibi Trinidad va Tobago bokschisi Darnell Sinasveyeni ikkinchi raundda texnik nokautga uchratdi.
Shuningdek, o‘z vaznlarida Javohir Mehriddinov turkiyalik Mert Aybug‘a, Halimjon Ma’masoliyev armanistonlik Davit Simonyanni mag‘lub etdi. Afsuski, Abdulaziz Abdunazarov o‘z vaznida hakamlarning qarorlariga ko‘ra 3:2 hisobida rossiyalik Anatoli Rebediukga imkoniyatni boy berib qo‘ydi.
Qizlar bahsida Feruza Sharipova kongolik Kerena Pxobani, Zilolaxon Yusufova xitoylik Qiaoxian Xini, Jasmin Tohirova rossiyalik Daria Zrianina va marokashlik Hadija Bargachni yengdi.
Ha, bugungi yoshlarimiz har qanday sohada aniqroq aytadigan bo‘lsak, sport sohasida dunyo mamlakatlarini o‘z muvaffaqiyatlari bilan hayratga solmoqda. Umid qilamizki, Budva shahrida boks bo‘yicha yoshlar o‘rtasida o‘tayotgan jahon chempionatida ham yosh bokschilarimiz ulkan zafarlar bilan yurtimizga qaytadi.
Ma’lumot o‘rnida: 29-30 oktyabr kunlari jahon chempionati doirasida chorak final bahslari bo‘lib o‘tadi.
Javohir Toshxo‘jayev, O‘zA