Фармацевтика маҳсулотлари хавфсизлиги маркази ахборот хизмати соҳа мутахассислари томонидан берилган маълумотлар ижтимоий тармоқларда нотўғри талқин қилинаётганини айтмоқда. Шу боис билдирилаётган ана шундай фикрлар юзасидан қуйидагиларни маълум қилди:
“Дори воситалари ва фармацевтика фаолияти тўғрисида”ги Ўзбекистон Республикаси қонунига мувофиқ, дори воситаларининг, тиббий буюмларнинг ва тиббий техниканинг тиббиёт амалиётида қўлланилишига, қоида тариқасида, улар давлат рўйхатидан ўтказилгандан кейин рухсат этилади. (Ҳозирга қадар мамлакатимизда 9294 та дори воситаси давлат рўйхатидан ўтказилган.)
Қайд этилганидек, 2023 йил давомида ҳуқуқни муҳофаза қилиш органлари ва тиббиёт ташкилотлари ҳамда фуқаролар томонидан дори воситалари ва тиббий буюмларни экспертиза қилиш юзасидан келиб тушган мурожаатлар асосида 6000 дан ортиқ турдаги (давлат рўйхатидан ўтмаган ва ноқонуний муомалада бўлган) дори воситаларининг тиббиёт амалиётида қўллаш мумкин эмаслиги юзасидан тегишли хулосалар берилди.
Бундан ташқари, 2022 йилда юртимизда дори воситалари билан рўй берган нохуш ҳолатларнинг қайта такрорланмаслигини олдини олиш мақсадида “Фармацевтика маҳсулотлари хавфсизлиги маркази” директорининг тегишли буйруғига биноан, 2023 йил давомида Марказ ва унинг филиаллари лабораторияларида давлат рўйхатидан ўтказиш, рўйхатдан ўтказилганлик гувоҳномасини амал қилиш муддатини узайтириш, шунингдек, мувофиқликни баҳолаш (сертификатлаштириш) мақсадида тақдим этилган 1000 дан ортиқ сериядаги дори воситаларининг таркибида этиленгликоль ва диэтиленгликолни аниқлаш синовлари амалга оширилди.
Таъкидлаш жоиз, бу назорат таҳлиллари орқали, мазкур дори воситаларининг таркиби текширилиб юқоридаги зарарли моддалар мавжуд эмаслиги аниқланди. Афсуски бу маълумот, айрим телеграм каналлар орқали умуман бошқа мазмунда нотўғри талқин қилинмоқда.»
ЎзА