Сенатнинг Бюджет ва иқтисодий масалалар қўмитасида “Солиқ маъмуриятчилиги такомиллаштирилиши, шунингдек солиққа оид ҳуқуқбузарликлар учун жавобгарлик ва валютани тартибга солиш либераллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун дастлабки тарзда муҳокама қилинди.

Таъкидланганидек, тегишли қонун ҳужжатларига тадбиркорлик субъектларининг айни бир ҳуқуқбузарлик учун бир неча маротаба жавобгарликка тортилишининг олдини олиш, солиқ маъмуриятчилигини янада такомиллаштиришга қаратилган ўзгартиришлар киритиш долзарб аҳамият касб этади.

Сенаторлар ташқи савдо операциялари бўйича активларнинг репатриация қилиниши талабларини қайта кўриб чиқиш зарурлиги ҳақида ҳам фикр билдирди.

Қонун билан “Валютани тартибга солиш тўғрисида”ги қонунга ташқи савдо операциялари бўйича активларнинг қонунда белгиланган муддатларда репатриация қилинишини таъминламаганлик учун жавобгарлик чораларини либераллаштириш, шунингдек, активларни репатриация қилиш бўйича талабларни соддалаштиришга қаратилган ўзгартиришлар киритилмоқда.

Солиқ ва Маъмурий жавобгарлик тўғрисидаги кодекслар шахснинг айни бир ҳуқуқбузарлик учун бир маротаба жавобгарликка тортилишини таъминлашни ҳамда солиқ маъмуриятчилигини янада такомиллаштиришни назарда тутувчи нормалар билан тўлдирилмоқда.

Қўмита аъзолари қонун ташқи савдо операцияларини амалга оширишда қулайликлар яратилиши ва активларнинг қонунда белгиланган муддатларда репатриация қилинишини таъминлашга, шунингдек, тадбиркорлик субъектларига ўз фаолиятини амалга ошириши учун янада қулай шарт-шароитлар яратишга хизмат қилишини таъкидлади.

Муҳокама якунлари бўйича тегишли қарор қабул қилинди.

Н.Абдураимова,

ЎзА