Яқинда юртимизда Ислом олами маданий мероси бўйича қўмитанинг 13-сессияси бўлиб ўтган эди. Ушбу йиғилишда Ислом олами маданий мероси рўйхатига Ўзбекистон моддий ва номоддий маданий мерос объектларининг киритилиши кутилаётгани ҳақида маълум қилган эдик.

Ўзбекистонда бўлиб ўтган Ислом олами маданий мероси бўйича қўмитанинг 13-сессияси якуний хулосалари маълум қилинди. Унга кўра, Ўзбекистон томонидан тақдим этилган 9 та номзодномалардан 7 таси маъқулланиб, ICESCOнинг Моддий ва номоддий маданий мерос объектлари бошланғич рўйхатига киритилди.

Рўйхатга қуйидагилар киритилган:

– 4 та номоддий маданий мерос намунаси – ёғоч ўймакорлиги санъати, миниатюра санъати, хаттотлик санъати, китобат ва таҳзиб санъати;

– 3 та моддий маданий мерос объекти – Қадимий Термиз мажмуаси, Шаҳрисабз тарихий мажмуаси, Миздаҳкан тарихий мажмуаси.

Маълумот ўрнида, бугунги кунга қадар Ўзбекистон Республикасининг 19 та моддий ва номоддий маданий мерос объектлари ICESCOнинг Моддий ва номоддий маданий мероси рўйхатига киритилган.

Куни кеча рўйхатга олинганлар билан жами 26 та Ўзбекистоннинг моддий ва номоддий маданий мерос объектлари ICESCO рўйхатига киритилди.

Н.Усмонова, ЎзА