Оқ уй АҚШ Президенти Дональд Трамп келаси ҳафта Жанубий Кореяда бўлиб ўтадиган Осиё саммити доирасида ХХР Раиси Си Цзиньпин билан учрашишини маълум қилди.

Бинобарин, Америка етакчиси Хитой ноёб тупроқ унсурлари экспортига нисбатан жорий этган кутилмаган чеклов ва дунёнинг йирик иқтисодиётлари ўртасида савдо зиддияти кучайиб бориши асносида Чин мамлакати раҳбари билан учрашув масаласида иккиланиб қолди, деб ёзган «The Washington Times».

Трамп эса «Учрашув икки давлат муносабатида ижобий натижа бериши мумкин», деб ҳисоблайди.

–  Ўйлайманки, биз келишувга эришамиз, – деган у. – Си Цзиньпин билан учрашув Осиё сафарининг бир қисми, Шарқий Осиёга ташрифнинг асосий воқеасидир.

Аввалроқ АҚШ раҳбарининг Хитой билан савдо уруши давом этаётгани ҳақидаги баёноти янграган. Қолаверса, Оқ уй раҳбари 1 ноябрдан ХХРдан бораётган товарларга 100 фоиз бож жорий этиш, барча муҳим дастурий таъминотларга экспорт чеклови киритиш режасини ҳам маълум қилган.

Қорақалпоғистон ахборот агентлиги