15 октябрь – Халқаро қишлоқ аёллари куни

Тошкент давлат аграр университетида “Халқаро қишлоқ аёллари куни” муносабати билан тантанали байрам тадбири бўлиб ўтди. Ўзбекистон Республикаси Қишлоқ хўжалиги вазирлиги, Оила ва хотин-қизлар қўмитаси, FAO – БМТнинг Озиқ-овқат ва қишлоқ хўжалиги ташкилоти, “Аграр соҳа аёллари” уюшмаси ҳамда Тошкент давлат аграр университети ҳамкорлигида ташкил этилган тадбирда дастлаб олима аёлларнинг илмий ва инновацион ишланмалари кўргазмаси ташкил этилди.

Унда аёллар томонидан ишлаб чиқилган замонавий агротехнологиялар, экологик барқарор ечимлар ҳамда инновацион стартап лойиҳалар намойиш этилди. Меҳмонларга университет иқтидорли талабалари ижодидан намуналар тақдим этилди. “Art Galereya” кўргазмасида намойиш этилган санъат асарлари меҳмонларда катта таассурот қолдириб, улар ёш ижодкорларнинг истеъдодига юксак баҳо берди.

Шундан сўнг тадбирда Бош вазир ўринбосари – Оила ва хотин-қизлар қўмитаси раиси Зулайҳо Маҳкамова ўз нутқида қишлоқ аёлларининг озиқ-овқат хавфсизлигини таъминлаш, инновацион технологияларни жорий этиш ва фермерлик маданиятини ривожлантиришдаги ўрнини алоҳида таъкидлади.

Қайд этилганидек, бугунги кунда мамлакатимиз аграр тизимида фаолият юритаётган аёллар нафақат ўз оилаларининг, балки мамлакат иқтисодий барқарорлигининг ҳам таянч кучига айланган. Ҳозир қишлоқ хўжалигида ишлаб чиқариш самарадорлигини ошириш, инновацион ёндашувларни татбиқ этиш ва ижтимоий барқарорликни мустаҳкамлашда аёллар муҳим роль ўйнамоқда. Уларнинг билим ва тажрибаси янги технологияларни жорий этиш, ресурслардан оқилона фойдаланиш ҳамда маҳаллий ишлаб чиқаришни кенгайтиришда катта аҳамият касб этади.

Шу боис, мазкур тадбир аёллар салоҳиятини янада рўёбга чиқариш, уларни илм-фан ва инновациялар соҳасига кенгроқ жалб этиш йўлида стратегик аҳамиятга эга муҳим қадам ҳисобланади.

Анжуман якунида “Бунёдкор қишлоқ аёллари” ҳужжатли фильми намойиш этилди. Шунингдек, аграр соҳада фидокорона меҳнат қилган, янгича ташаббуслари билан тармоқ ривожига ҳисса қўшган аёллар Қишлоқ хўжалиги вазирлиги расмийлари томонидан тантанали равишда тақдирланди.

Меҳмонлар учун ўтказилган байрам концерти эса иштирокчиларга кўтаринки кайфият улашди.

А.Мусаев, ЎзА.