БМТга аъзолик…

Ўзбекистон 1991 йилда мустақилликни эълон қилгач, 1992 йил 2 мартда Бирлашган Миллатлар Ташкилотига тўлақонли аъзо давлат сифатида қабул қилинди. Шу кундан бошлаб, мамлакат БМТ ва унинг агентликлари билан фаол ҳамкорлик қилиб келмоқда.

1-йўналиш: Ўзбекистон ва БМТ ҳамкорлиги

Ўзбекистон БМТнинг UNDP, UNICEF, WHO, UNESCO, UNODC, ILO, FAO, IOM каби нуфузли агентликлари билан яқин ҳамкорлик қилади. Бу ҳамкорлик инсон ҳуқуқлари, соғлиқни сақлаш, таълим, атроф-муҳит муҳофазаси ва иқтисодий тараққиёт соҳаларида амалга оширилмоқда.

2021–2023 йилларда Ўзбекистон Бирлашган Миллатлар Ташкилотининг Инсон ҳуқуқлари бўйича кенгаши аъзоси сифатида ҳам глобал жараёнларда фаол иштирок этди.

2-йўналиш: Президент Шавкат Мирзиёевнинг БМТдаги ташаббуслари

72-сессия (2017 йил):

Президент Шавкат Мирзиёев Бирлашган Миллатлар Ташкилоти минбаридан «Инсон манфаатлари биринчи ўринда бўлиши керак» деган тамойилни илгари сурди. Шу тариқа «Янги Ўзбекистон» дастурини тақдим этиб, чуқур ислоҳотлар, демократия ва инсон ҳуқуқларини ҳимоя қилишга доир ташаббусларни дунёга маълум қилди.”

75-юбилей сессия (2020 йил):

COVID-19 пандемияси даврида Президент глобал ҳамжиҳатликни кучайтириш, инсон ҳуқуқлари ва экологик муаммоларни ҳал этиш бўйича қатор муҳим таклифлар билдирди.

76-сессия (2021 йил):

Ўзбекистон раҳбари минтақавий боғлиқлик ва экология масалаларига алоҳида эътибор қаратди. Афғонистондаги вазият ва сув ресурсларидан оқилона фойдаланиш ҳам кун тартибида бўлди.

78-сессия (2023 йил):

Президент Шавкат Мирзиёев «Самарқанд бирдамлик ташаббуси»ни дунёга эълон қилди. Нутқда инсон қадри, янгиланган Конституция, экологик хавфлар ва иқлим ўзгариши масалалари устувор йўналиш сифатида кўтарилди. Шу билан бирга, ёшлар муаммоси ва сув ресурслари тақсимоти глобал аҳамиятдаги масалалар сифатида таъкидланди.

Шавкат Мирзиёевнинг БМТ Бош Ассамблеясидаги чиқишлари фақат Ўзбекистон ичидаги ислоҳотлар ҳақида эмас, балки бутун инсоният тақдири билан боғлиқ глобал муаммолар ҳақида ҳамдир.

Бугунги кунда Ўзбекистоннинг БМТ билан ҳамкорлиги мамлакатнинг нуфузини ошириб, унинг халқаро майдондаги фаол позициясини янада мустаҳкамлаб бормоқда.

Беҳруз Худойбердиев, Искандар Исматов (видео), ЎзА