Тошкент катта футзал ва футбол байрамига мезбонлик қилади
Ўзбекистонга Роберто Карлос, Марко Матерацци, Дуглас Майкон, Франк Рибери, Клод Макелеле, Кристиан Заккардо каби жаҳон футболининг тирик афсоналари келмоқда.
Мамлакатимизда Ўзбекистон футзал федерацияси ташкил этилганидан буён амалга оширилаётган кенг кўламли ислоҳотлар, жорий этилаётган лойиҳалар, ёш иқтидорларни кашф қилиш, профессионал спортчилар маҳоратини янада ошириш борасида ишлар натижасида аҳоли ўртасида футзалга қизиқиш ортди.
2025 йилги мавсумнинг суперкубок финали билан бошланаётганлигида ҳам футзалнинг оммавийлигини таъминлаш назарда тутилган.
Эртага, 26 август куни пойтахтимиздаги “Ҳумо-арена” спорт мажмуасида ўтказиладиган футзал бўйича суперкубок учрашуви нафақат одатдаги тадбир, балки Ўзбекистоннинг спорт салоҳиятини жаҳонга кенг танитишга қаратилганлигидан далолат.
Пойтахтимиздаги “Wyndham Tashkent” меҳмонхонаси ушбу тадбир ҳамда футзал бўйича ўтказиладиган 2025/2026-йилги янги мавсум бошланишига бағишлаб ташкил этилган брифингда шу ҳақда сўз борди.
Суперкубок иштирокчилари BMB ва “Oil-Star” жамоалари бош мураббийлари, футзал мутахассислари, журналистлар иштирок этган тадбир аввалида Ўзбекистон футзал федерацияси президенти Бекзод Маматқулов янги мавсум тадориги, режалар, юртимизга келаётган жаҳон футболининг афсоналари иштирокида ташкил этиладиган тадбирлар, аҳоли ўртасида оммавий спортни ривожлантиришда футзалнинг ўрни, истеъдодли футзалчиларни танлаш, йўналтириш борасида қилинаётган ишлар хусусида журналистларга ахборот берилди.
Таъкидланганидек, 2025-2026 йилги Олий лига футзал мусобақалари 2 -7 сентябрь кунлари пойтахтимиздаги “Юнусобод” спорт мажмуасида бўлиб ўтади.
Мусобақаларда иштирок этадиган 12 жамоанинг 8 таси хорижлик футзалчилар хизматидан фойдаланиш йўлини танлагани, Бразилиядан келган ўйинчилар сони 21 нафарни, умумий легионерлар 31 нафарни ташкил этаётгани Ўзбекистонда футзал жадал ривож топаётганидан, оммалашаётганидан, рақобат кучайиб бораётганлигининг ёрқин далили.
Юртимизда футзал жамоалари футбол клублари қошида эмас, алоҳида клуб сифатида шакллантиришга эътибор қаратилганлиги натижасида бу йилдан Олий лигада совринли ўринлар учун даъвогарлар сонини ортди. Зеро, барча жамоалар мавсумга катта ниятлар, мақсадлар билан тайёргарлик кўришганлиги ўтказилган ўртоқлик учрашувларидаги ҳисобларда ўз аксини топди.
Айтиш лозим, эртага пойтахтимиздаги “Ҳумо арена” спорт саройида катта BMB ва “Oil-Star” жамоалари ўртасида Ўзбекистон Супер кубоги финали учрашуви билан бир қаторда жаҳон футболининг тирик афсоналари иштирокида катта футбол байрами уюштирилади.
Брифингда “Милан”нинг афсонавий дарвозабони, 2 карра УЕФА чемпионлар лигаси ғолиби, жаҳон чемпиони Дида, “Реал Мадрид”нинг собиқ футболчиси, 3 карра УЕФА чемпионлар лигаси ғолиби Роберто Карлос, Италия терма жамоаси сафида 2006 йилги Жаҳон чемпионати олтин медали соҳиби Марко Матерацци, шунингдек, Дуглас Майкон; Франк Рибери, Клод Макелеле, Кристиан Заккардо, Сержиньо каби машҳур футболчиларнинг Ўзбекистонга келиши, улар иштирокидаги тадбирлар ҳақида қизиқарли маълумотлар айтиб ўтилди.
Шу билан бирга, ЎФФ президенти Б. Маматқулов Тошкентдаги “Бунёдкор” футбол академияси футбол майдонида кўп сонли футбол фахрийлари ҳамда футбол мухлислари иштирокида Ўзбекистон ва жаҳон футболи афсоналари ўртасида ўтадиган ўртоқлик учрашуви ҳақида тўхталиб, мазкур футбол байрами тадбирлари Ўзбекистон мустақиллигининг 34 йиллик тантаналари арафасида миллионлар ўйини ишқибозларига кўтаринки кайфият ҳамда чинакам спорт байрами руҳини тақдим этиши билан аҳамиятли эканлигини билдирди.
Т. Рўзиев, А. Мамадаминов (сурат) ЎзА