АҚШнинг Сент-Луис шаҳрида шахмат бўйича давом этаётган “Saint Louis Rapid & Blitz 2025” турнири қизғин паллага кириб бормоқда.

Бугун, 13 август куни мукофот жамғармаси 175 минг АҚШ долларидан иборат халқаро турнирнинг 7, 8 ва 9-тур ўйинлари ўтказилади.

Унда ҳамюртимиз Нодирбек Абдусатторов 7-турда қора доналарда франциялик Максим Вашье-Лаграв, 8-турда ҳам қора доналарда америкалик Сэм Шанкланд, 9-турда оқ доналарда АҚШ вакили Леньер Домингес билан куч синашади.

Кеча ўтган 4-турда Абдусатторов оқ доналарда асли россиялик, ҳозирда АҚШ шарафини ҳимоя қилаётган Григорий Опаринни мағлубиятга учратди. Бешинчи турда қора доналарда блиц бўйича жаҳон чемпиони, вьетнамлик Льем Ле Ле билан, 6-турда оқ доналарда амалдаги жаҳон чемпиони, ҳиндистонлик Гукеш Доммаражу билан дуранг ўйнади.

Ушбу натижалардан кейин Нодирбек 5 очко жамғарган ҳолда 10 нафар иштирокчи орасида 7-ўринда бормоқда.

Эслатиб ўтамиз, турнирда ғолибликка эришган шахматчи 40 минг АҚШ долларига эга чиқса, қолган 9 та ўриндан жой олганлар белгиланган мукофот пуллари билан тақдирланади.

Т.Рўзиев,

ЎзА