Олий таълим, фан ва инновациялар вазирлиги матбуот хизматининг маълум қилишича, 2025/2026-ўқув йили учун республика олий таълим муассасалари тасарруфидаги академик лицейларга кириш имтиҳонларининг якуний натижалари (мандат) эълон қилинди.

Якуний натижаларни вазирликнинг my.edu.uz расмий веб-сайтидан “Шахсий кабинет”га кириш орқали билиш мумкин.

Абитуриентнинг бали танлаган биринчи академик лицей йўналиши бўйича ўқишга қабул қилишга етарли бўлса, унинг кириш тест синови натижалари ушбу лицей йўналишида эълон қилинади. Бунда абитуриентга танлаган иккинчи ва учинчи академик лицей йўналиши бўйича танловда иштирок этишга рухсат этилмайди.

Агар абитуриент танлаган биринчи академик лицей йўналиши бўйича тўплаган бали ўқишга қабул қилишга етарли бўлмай, у танлаган иккинчи лицей йўналиши бўйича ўқишга қабул қилишга етарли бўлса, унинг кириш тест синови натижалари ушбу иккинчи академик лицей йўналишида эълон қилинади. Бунда абитуриентга танлаган учинчи академик лицей йўналиши бўйича танловда иштирок этишга рухсат этилмайди.

Тўпланган балл танланган биринчи ва иккинчи академик лицейнинг йўналиши бўйича ўқишга қабул қилишга етарли бўлмай, абитуриент танлаган учинчи лицей йўналиши бўйича ўқишга қабул қилишга етарли бўлса, унинг кириш тест синови натижалари фақат учинчи лицей йўналишида эълон қилинади. У танлаган биринчи, иккинчи ва учинчи академик лицей йўналиши бўйича ўқишга қабул қилишга етарли бўлмаган тақдирда, унинг кириш тест синови натижалари биринчи танлаган лицей йўналишида эълон қилинади.

Агарда битта йўналиш бўйича охирги қабул ўрни учун икки ёки ундан кўп абитуриентнинг тўплаган умумий бали тенг бўлиб қолса, уларнинг барчаси ўқишга қабул қилинади.

Маълумот ўрнида таъкидлаш лозимки, ўқувчи тўплаган бали асосида устуворлик бўйича танлаган академик лицейга ўқишга қабул қилинади. Белгиланган тартибга мувофиқ, кириш тест синови натижасидан норози бўлган ўқувчилар якуний натижалар эълон қилинган кундан бошлаб уч иш куни ичида my.edu.uz орқали электрон шаклда (шахсий кабинетидан) апелляция шикоятини бериш ҳуқуқига эга.

Муҳайё Тошқораева, ЎзА