1994 йилда Осиё футбол конфедерацияси ва ФИФАга расман аъзо бўлган футбол бўйича Ўзбекистон терма жамоаси ўша йилнинг ўзида, Япониянинг Хиросима шаҳрида ўтказилган Осиё ўйинларида олтин медални қўлга киритган эди.
Шундан сўнг мамлакатимиз терма жамоаси Францияда ўтказиладиган жаҳон чемпионати йўлланмасини киритиш учун саралаш ўйинларида иштирок этиб, унда муваффақиятсизликка учраган эди.

Мана шундан буён ҳам орадан 29 йил вақт ўтди. Бу жаҳон тарихи учун қисқа бўлса-да, юртимиз футболчилари ва мухлислари учун узоқ кутилган давр бўлди. Сабаби, шу йиллар ичида дунё бўйича 6 марта жаҳон чемпионати учун саралаш ўйинлари ўтказилиб, терма жамоамизнинг қанчадан-қанча кучли футболчилари жаҳон чемпионатига чиқа олмай армон билан ўзларининг футболчилик фаолиятини якунлашга мажбур бўлди.
Қанча халқимиз терма жамоамизга жонкуярлик қилиб, олти марта эзгу ниятлари пучга чиқмади дейсиз. Халқимизнинг кўп йиллик орзуси куни кеча Бирлашган Араб Амирликларининг Абу-Даби шаҳрида ўтказилган футбол бўйича жаҳон чемпионати саралаш босқичининг 9-турида рўёбга чиқди.

Хусусан, иқтидорли ёш мураббий Тимур Кападзе бошчилигидаги Ўзбекистон Миллий терма жамоаси Ал-Наҳаён стадионида ўз гуруҳида 3-ўринни эгаллаб келаётган Бирлашган Араб Амирликларига қарши ўйин ўтказиб, унда жамоамиз учун жуда қиммат бўлган 1 та очкони қўлга киритди ва 2026 йилда АҚШ, Мексика ва Канада футбол майдонларида бўлиб ўтадиган жаҳон чемпионатига муддатидан олдин йўлланмани қўлга киритишга муваффақ бўлди.
Футболчиларимизнинг ушбу тарихий муваффақияти бутун халқимизни чексиз қувонтирди ва Ўзбекистон Республикаси Президенти Ш.Мирзиёев терма жамоа бош мураббийи, футболчилар ва бутун мураббийлар штабини терма жамоамизнинг қўлга киритган ютуғи билан самимий табриклаб, телефон орқали уларга энг эзгу тилакларини билдирди.
Биз ҳам ўз навбатида бутун халқимизни футболчиларимизнинг 29 йилда қўлга киритган улкан ютуғи билан табриклаб, жаҳон чемпионатида ҳам яхши ўйинлар кўрсатишига тилакдошлик билдириб қоламиз.

Адилбай Оразов,
Қорақалпоғистон ахборот агентлиги шарҳловчиси.