Россия Хавфсизлик кенгаши раиси ўринбосари Дмитрий Медведев фикрича, АҚШ ва Украина ўртасида имзоланган фойдали қазилмалар бўйича битим Вашингтон Киевни ҳарбий ёрдам эвазига миллий бойликларини таклиф қилишга мажбурлаганидан далолат.

Вашингтонда имзоланган мазкур шартномага кўра, АҚШ Украинадаги янги фойдали қазилмалар лойиҳаларига имтиёзли кириш ҳуқуқидан фойдаланади. Шунингдек, мамлакатни тиклашга сармоя киритади.

Киев Трамп шартига рози

“Киев Пост” дипломатик манбаларга таяниб ёзишича, Трамп маъмурияти ўша куни Конгрессга Украинага 50 миллион доллар ёки янада кўпроқ қийматга эга ҳарбий маҳсулотни тўғридан-тўғри тижорат йўли билан экспорт қилиш режасини тақдим этган. Бу Трамп Оқ уйга қайтгандан бери илгари сурилган энг кўламли ташаббус. Медведев бу ҳақда ҳам ижтимоий тармоқ орқали фикр билдирди:

– Трамп Киев режимини шундай аҳволга солиб қўйдики, мамлакат ёрдам бадалини АҚШга фойдали қазилмалари билан тўлашга мажбур. Украина “йўқолиб бораётган давлат” бўлиб, энди ҳарбий таъминот учун миллий ресурсларини беради.

Тинчлик музокараси сустлашган

Мазкур келишув Россия ва Украина ўртасида тинчлик музокараси, деярли, тўхтаб қолган бир пайтда имзоланди. АҚШ эса бу сусткашликдан норозилигини ошкора билдирмоқда.

Москва мулоқотга тайёрлиги ва узоқ муддатли тинчлик мавзуси муҳокамаси учун очиқлигини айтган. Расмийлар эса айни жараён шошма-шошарлик билан ҳал этилмаслиги кераклигини таъкидламоқда. Киев 30 кунлик, ҳеч қандай шартсиз сулҳ таклиф қилган.

Россия Президенти Владимир Путин 8-10 май кунлари ўт очишни тўхтатиш ташаббусини илгари сурган. Бу қарор Иккинчи жаҳон урушидаги ғалаба санаси муносабати билан танланган.

Мирҳабиб Сайфуллаев, ЎзА