Бутунжаҳон бокс ассоциацияси(WBA) профессионал бокснинг энг ўрта вазн тоифасида жанг олиб бораётган ҳамюртимиз, “Рио-2016” совриндори Бектемир Мелиқўзиевнинг навбатдаги жанг санаси ва рақибини эълон қилди.

Унга кўра, маҳоратли боксчимиз жорий йилнинг 30 май куни АҚШнинг Лас-Вегас шаҳрида ташкил этиладиган проф бокс оқшомида америкалик Дарьюс Фулгхэм билкан рўбарў келиши белгиланди. WBA элиминатор мақомида ўтказиладиган мазкур қарама-қаршилик ғолиби кейинги жангида айнан чемпионлик камари учун рингга кўтарилиши назарда тутилса, Бектемир WBA Super камари соҳиби Сауль Альварес ёки чемпионликка вақтинча эгалик қилаётган Калеб Плант шунингдек, WBA Gold соҳиби Увель Эрнандес билан тўқнаш келиши эҳтимолдан йироқ эмас. Бунинг учун Мелиқўзиев Фулгхэмни томошабинлар сафига кузатиб қўйиши керак бўлади.

Таъкидлаш лозимки, профессионал бокснинг ушбу йўналиши ва вазнида айни пайтда мексикалик Сауль Альварес Канело энг кучли боксчи саналади. Афсонавий Конело билан жанг қилиш истаги кўплаб чарм қўлқоп усталари хаёлини ўғирлагани бор гап. Шундай вазиятда Мелиқўзиев – Сауль Альварес “дуэли” рўй бериши ҳамюртимизнинг 30 майдаги ҳаракати қай даражада кечишига боғлиқ.

Эслатиб ўтамиз, 29 ёшли Мелиқўзиев профессионал боксда 16 та жангда қатнашиб, 15 ғалаба, 1 та мағлубиятга эришган. Дарьюс эса 14 та жанг ўтказиб, барчасида зафар қучган.

Т.Рўзиев, ЎзА