Афғонистоннинг “Толибон” ҳаракати Россияда тасдиқланган террор ташкилотлари рўйхатидан чиқарилган биринчи ном бўлди. Бу ҳаракат фаолияти РФ ҳудудида 20 йилдан кўпроқ вақт тақиқланган эди.
РБК нашри хабарида айтилишича, Россия Олий суди Бош прокуратуранинг “Толибон” фаолиятига тақиқни бекор қилиш тўғрисидаги даъвосини қаноатлантирган.
Мажлис ёпиқ тартибда ўтказилган. Матбуотда фақат қарорни эълон қилишга рухсат берилганлиги сабабли, даъво аризасининг тўлиқ тафсилоти маълум эмас.
Ўтган йил декабрда маъмурий суд ишини юритиш кодекси ва терроризмга қарши кураш тўғрисидаги федерал қонунга киритилган ўзгариш судга мурожаат қилиш учун ҳуқуқий асос бўлди.
2021 йил август ойида АҚШ ўз аскарларини Афғонистондан олиб чиқиб кетиш асносида “Толибон” мамлакатда ҳокимиятни қўлга олди. Ҳаракат аъзолари тарихда иккинчи марта Афғонистон Ислом амирлиги тузилишини эълон қилди. Шундан сўнг шариат меъёрида аёллар ҳуқуқи ва эркинлиги таъминланишига ҳам ваъда берди.
РФ расмийлари “Толибон” билан сиёсий алоқани давом эттирмоқда. Ўтган йил январь ойида ташқи ишлар вазири Сергей Лавров мамлакат “Толибон” билан муносабатда экани, аммо ушбу ҳаракат сиёсий мажбуриятни тўлиқ бажармагунча, гуруҳ томонидан тузилган ҳукуматни тан олмаслигини билдирган.
2023 йил “Толибон” Қозоғистондаги террор тузилмалари рўйхатидан чиқарилди. Ўтган йил сентябрь ойида Қирғизистон Бош прокуратураси ҳам республикада тақиқланган ташкилотлар реестрини янгилаб, ҳужжатдан толибонларни чиқариб ташлаган.
Ў.Алимов, ЎзА