Россиянинг Хабаровск шаҳрида бокс бўйича “Константин Коротков“ халқаро хотира мусобақасининг кечаги баҳсларида 9 нафар боксчимиз рингга кўтарилди.

Мусобақанинг вазни 54 килограммгача бўлган боксчилар беллашувида қизиқ ҳолат рўй берди. Ушбу вазндаги чорак финал баҳсларида ака-ука Ҳасанбой ва Фарёзбек Дўсматовлар ўзаро тўқнаш келди. Бироқ Олимпия ўйинлари ғолиби Ҳасанбой ушбу жангга чиқмади ва Фарёзбек ярим финалда қозоғистонлик Сакен Бибосиновга қарши рингга кўтариладиган бўлди. Аслида мазкур мусобақа олдидан кўплаб бокс мухлислари Ҳасанбой Дўсматов ва Сакен Бибосинов жангини кутган эди. Энди эса барчамиз Фарёзбекка мухлислик қиламиз.

Шунингдек, кечаги баҳсларда Азиза Зокирова, Муҳаммадазизбек Исмоилов, Асилбек Абдураҳмонов, Раҳматилла Бойматов, Санжар Ваҳобов, Абдуллоҳ Маъдаминов ва Адҳамжон Муҳиддинов каби чарм қўлқоп усталаримиз ўз вазнларида ғалаба қозонди. Фақат Шодиёржон Мелиқўзиев мағлубиятга учради.

“Константин Коротков” халқаро хотира турнирида бугун чорак финал жанглари давом этади ва унда 6 нафар боксчимиз жанг қилади:

-50 кг: Гулсевар Ганиева – Мунгунсаран Бальсан (Мўғулистон)

-57 кг: Хуморабону Мамажонова – Мичдма Эрденедалай (Мўғулистон)

-60 кг: Рашида Тагирова – Анастасия Алексева (Россия)

-60 кг: Шоҳрух Абдумаликов – Дмитрий Дворниченко (Беларусь)

-66 кг: Айсанем Саруарова – Мбамба Мервейль (Конго)

-86 кг: Нусратбек Тоҳиров – Анзор Сулейманов (Россия)

Жавоҳир Тошхўжаев, ЎзА