Ўзбекистон Республикаси Президенти Ш.Мирзиёевнинг Парламентлараро Иттифоқнинг 150-юбилей ассамблеясидаги нутқи хорижий парламентарийлар, шу билан бирга, Олий Мажлис Қонунчилик палатаси депутатлари томонидан кенг эътироф этилмоқда.

Қуйи палата депутати, Ўзбекистон Экологик партияси фракцияси аъзоси Наврўзбек Юсупов бу борада ўз муносабатини баён қилди:

– Давлатимиз раҳбари ўз нутқида дунё парламентларининг муҳтарам аъзолари бугунги кунда жаҳон ҳамжамиятидаги муаммоларни энг қуйи бўғиндан тортиб, халқаро майдонга ҳам олиб чиқаётганлигини алоҳида эътироф этди. Шунингдек, сайёрамизнинг турли жойларида нотинчликлар рўй бераётган бир даврда Парламентлараро Иттифоқ халқлар тинчлигини сақлаш, ҳамкорлигини янада ривожлантиришга кўмаклашиш борасидаги фаолиятини самарали олиб бораётгани айтиб ўтилди.

Мамлакатимиз раҳбари нутқида барча муҳим масалаларга эътибор қаратар экан, айниқса, дунёнинг иқтисодий ўсишига алоҳида эътибор қаратди. Агар иқтисодиёт пастлаб, вазият кескинлашиб бораверса, бу аввало, ижтимоий ҳаётга ўзининг таъсирини кўрсатади. Яъни, 2030 йилга бориб 575 млн. аҳоли қашшоқликка дуч келиши, 84 млн. болалар саводсиз қолиши мумкинлиги таъкидланди.

Ўзбекистон дунё парламентларини бу юксак мақсадлар йўлида, яъни тинчлик, халқлар ўртасидаги ҳамжиҳатлик, парламентлар ўртасида қонун ижодкорлигини ривожлантириш борасида бир-бири билан ҳамкорлик алоқалари мустаҳкамланиши тарафдори.

Ўзбекистон бугунги кунда халқаро майдонда дунё ҳамжамияти билан жадал ва прагматик дипломатик алоқалар олиб бормоқда. Сўнгги йилларда Ўзбекистонда парламент томонидан давлат ва жамият ривожини таъминловчи кўплаб қонунлар қабул қилиш жадаллашиб борди. Шунингдек, 2023 йилда Ўзбекистон халқининг хоҳиш-иродаси билан янги таҳрирдаги Конституция қабул қилинганлиги, бунда парламентнинг ваколатлари кучайтирилганлиги таъкидлаб ўтилди. Маҳаллий Кенгашлар ваколатлари янада оширилганлиги, ўттиздан ортиқ ваколатлар маҳаллий Кенгашларга ўтказилганлиги эса аҳамиятлидир.

Вакиллик органи бўлган Парламентлараро Иттифоқ бугунги кунда барқарор ривожланиш, қонун ижодкорлиги, инсон ҳуқуқлари, гендер тенглигини таъминлаш, коррупцияга қарши курашиш борасида ишончли ишлар олиб бормоқда. Айниқса, БМТ томонидан қабул қилинган «Париж битими»да давлатлар ўзига олган мажбуриятларини бажариши ҳар қачонгидан ҳам муҳимдир.

“Давлатларнинг иқлим сиёсати бўйича илғор ташаббусларини қўллаб-қувватлаш, қайта тикланадиган энергия манбалари ва “яшил” технологияларга ўтишни рағбатлантириш парламентларнинг муҳим вазифасига айланса, албатта, салмоқли ютуқларга эришамиз”, деди Президент ўз нутқида. Дарҳақиқат, бугунги экологик вазиятда парламентларнинг бу йўналишдаги ҳамкорлиги долзарб аҳамият касб этади.

Муҳтарама Комилова ёзиб олди. ЎзА