iPhone 17 Air – Apple тарихидаги энг юпқа смартфон бўлиши мумкин. Инсайдер Мажин Бу ўзининг Х ижтимоий тармоғидаги саҳифасида iPhone 17 сериясининг барча моделларига тегишли макет расмларини эълон қилди. Ушбу макетлар SAPR чизмалари асосида тайёрланган бўлиб, улар аксессуарлар ишлаб чиқарувчилари учун ҳимоя қопқоқлари, экран плёнкалари ва бошқа маҳсулотларни яратишда фойдаланилади.

iPhone 17 Air – Apple тарихидаги энг юпқа смартфон бўлиши мумкин. Унинг қалинлиги атиги 5,5 мм, узунлиги 163 мм, кенглиги эса 77,6 мм бўлади. Бу ўлчамлар iPhone 17 Pro Max модели билан деярли бир хил бўлиб, 6,9 дюймли экранга эга бўлиши кутилмоқда.

Apple бир неча йиллардан бери дизайн жиҳатидан унчалик катта ўзгаришлар киритмаган эди. Бироқ янги iPhone 17 серияси сезиларли янгиланишларга эга бўлиши кутилмоқда. Смартфонлар моделга қараб Apple A19 ва A19 Pro процессорлари билан жиҳозланади.

Расмий тақдимот 2025 йил сентябрь ойида бўлиб ўтиши режалаштирилган.

Мадинабону Насриева, Улуғбек Тўхтаев, ЎзА