Ўзбекистон Республикасининг Словакиядаги Фавқулодда ва мухтор элчиси Бахтиёр Ибрагимов Словакия Президенти Петер Пеллегринига ишонч ёрлиғини топширди. Тантанали маросим Братиславадаги Грассалковичей саройида бўлиб ўтди.

Маросимдан сўнг ташкил этилган учрашувда томонлар Ўзбекистон ва Словакия ўртасидаги муносабатларнинг ҳозирги ҳолати ва алоқаларни янада ривожлантириш истиқболини муҳокама қилди.

Таъкидланганидек, сўнгги йилларда икки томонлама ҳамкорлик сифат жиҳатидан янги босқичга кўтарилган. Шу нуқтаи назардан 2025 йил сиёсий, савдо-иқтисодий ва маданий-гуманитар соҳаларда қатор муҳим тадбирлар ўтказиш режалаштирилгани мамнуният билан қайд этилди.

Бахтиёр Ибрагимов Ўзбекистоннинг Австрия, Албания ва Словакиядаги Фавқулодда ва мухтор элчиси сифатида аккредитациядан ўтган.

Аввалроқ, 2023 йил ноябрь ойида дипломат Австрия Президенти Александр Ван дер Белленга, 2025 йил январда эса Албания Президенти Байрам Бегайга ишонч ёрлиғини топширган эди. Шунингдек, элчимиз 2023 йил октябрда Венадаги қатор халқаро ташкилотлар, жумладан ЕХҲТ, БМТ Гиёҳванд моддалар ва жиноятчиликка қарши кураш бошқармаси, Ядро синовини ялпи тақиқлаш шартнома ташкилоти, Халқаро атом энергетикаси агентлигида ҳам аккредитациядан ўтган.

Азиза Алимова, ЎзА