Хитой 2050-йилга келиб тоза энергия ишлаб чиқариш учун термоядровий синтез технологиясидан фойдаланиши мумкин. Бу ҳақда Bloomberg хабар берди.

“Сунъий қуёш” деб номланаётган Хитой қурилмаси «токамак» услубида бўлиб, у ўта қиздирилган плазмани ушлаб туриш ва термоядровий реакцияларни давом эттириш учун кучли магнит майдонларидан фойдаланади. 2023-йилда технологияни ишлаб чиқиш учун 240 миллион доллар миқдорида сармоя жалб қилинган.

Таъкидланишича, ҳозирга қадар термоядровий синтезни ўрганишда фақат бир нечта давлатлар, жумладан, АҚШ, Россия ва Жанубий Корея сезиларли ютуқларга эришган. Бироқ, Хитой бу соҳада етакчилардан бири бўлиш учун илмий-техник саъй-ҳаракатларини оширмоқда.

Термоядро синтези — бу енгил атом ядроларининг оғирроқ ядроларга айланиши ва бу жараёнда катта миқдорда энергия ажралиб чиқиши жараёнидир. Бу механизм Қуёш ва бошқа юлдузларнинг ишлаши асосида ташкил этилади.

Атом ядроларининг бўлинишига асосланган анъанавий ядро энергетикасидан фарқли ўлароқ, термоядро реакцияси радиоактив чиқиндилар ҳосил қилмайди ва деярли тугамас энергия манбаи ҳисобланади.

Мадинабону Насриева, Улуғбек Тўхтаев, ЎзА