АҚШ Президенти Дональд Трамп Украина етакчиси Владимир Зеленский билан Оқ уйда музокара ўтказди. “Al-Jazeera” маълум қилишича, учрашув баҳс-мунозарага бой кечган.

Тахминан 45 дақиқа давом этган мулоқотнинг сўнгги 10 дақиқаси Трамп, вице-президент Жэй Ди Вэнс ва Зеленский орасидаги кескин тортишувга айланган.

Ҳаммаси Вэнснинг Украина раҳбарига қарата “Жаноб Президент, одоб сақланг, менимча Овал кабинетга кириб, Америка оммавий ахборот воситалари вакиллари олдида ўзингизни бундай тутишингиз ҳурматсизлик” деган гапидан кейин авж олди.

Зеленский эътироз билдиришга уриниб, овозини кўтаришга мажбур бўлди.

Шунда Америка етакчиси юзини ОАВ ходимлари томонга ўгириб, “Владимир Зеленский ўт очишни тўхтатиш сулҳига тайёр эмаслиги”ни иддао қилди. Унинг суҳбатдоши эса Киев сулҳга рози бўлиши учун Вашингтондан хавфсизлик кафолати талаб қилди.

Дональд Трамп бу сўровга жавобан Зеленский “АҚШга етарли ҳурмат кўрсатмаётгани, Америкага қандай йўл танлаш бўйича кўрсатма беришга ҳақи йўқлиги”ни билдирди. Шундан сўнг икки раҳбар ўртасида “даҳанаки жанг” кучайди.

– 350 миллиард доллар бердик, ҳозир қийин аҳволдасиз, – деди Трамп. – Сиз буни хоҳлайман, буни хоҳламайман, дея олмайсиз. Бизсиз қўлингизда ютуқли карта йўқ, АҚШдан миннатдор бўлишингиз керак. Ё шу битим тузилади ё сиз ўйиндан чиқасиз.

Украина етакчиси Трампнинг бу гапига жавобан “Мен бу ерга карта ўйнаш учун келганим йўқ”, деган.

Трамп журналистларнинг “Агар сулҳ тузилмаса, Украинага яна аслаҳа юборасизми?”, мазмунидаги саволига “Кўпроқ қурол юборишимиз мумкин, лекин хоҳламаяпмиз, ҳозир урушни тезроқ тугатиб, бошқа иш билан шуғулланишимиз керак”, дея жавоб берди.

Учрашув давомида Трампга “Украина ва Россия ўртасида воситачимисиз ёки Украина томонида турибсизми?” саволи ҳам берилди. Трамп эса воситачи экани ва ҳеч кимнинг ёнини олмоқчи эмаслигини таъкидлади:

– Мен Россия ва Украина ўртасидаман. Ҳеч ким ҳақида ёмон сўз айтмоқчи эмасман.

Зеленский Трамп айтганидек, ўт очишни тўхтатиш ва сулҳ тузиш фикрига қарши чиқиб, Россия барибир сулҳни бузади, деб ҳисоблашини маълум қилди:

– Бизга шунчаки ўт очиш тўхтатилиши керак эмас. Аввал шундай сулҳ тузиб кўрганмиз, Путин шартларни 25 марта бузган.

Учрашув Дональд Трампнинг Зеленскийни Учинчи жаҳон урушини бошлаш эҳтимоли билан ўйнашаётганликда айблаб, бу ҳолат телевидение учун ажойиб шоу бўлади, деган сўзлари билан якунига етган.

Украина етакчиси Оқ уйни муддатидан олдин тарк этди. Натижада қўшма матбуот анжумани бекор қилинди.

М.Пирматова, ЎзА