Жаҳон банкининг маблағи ҳисобига Ўзбекистон Республикаси ветеринария ва чорвачиликни ривожлантириш қўмитаси ҳузуридаги олий таълим муассасалари ва техникумлар учун замонавий лаборатория жиҳозларини харид қилиш, шунингдек, Самарқанд давлат ветеринария медицинаси, чорвачилик ва биотехнологиялар университети Нукус филиалида ветеринария клиникаси ва виварий қурилиши кўзда тутилган.

Ушбу муҳим лойиҳа ветеринария ва чорвачилик соҳасининг рақобатбардошлигини ошириш, талабаларга амалиётлар ва илмий тадқиқотлар олиб бориш учун замонавий шарт-шароитлар яратишга қаратилган.

Клиника ва виварий учун зарур бўлган жиҳозлар билан таъминлаш ва техник хусусиятларни тайёрлаш мақсадида тендер асосида Беларус Республикасидан “Стратегик ва иқтисодий ривожланиш агентлиги” (ASER) консалтинг компанияси танлаб олинган. Мазкур консалтинг компаниясининг мутахассислари Александр Напылов ҳамда Алена Щербакова Самарқанд давлат медицинаси, чорвачилик ва биотехнологиялар университети Нукус филиалига ташриф буюрди.

Ташриф аввалида консалтинг компанияси вакиллари филиал раҳбарияти билан лойиҳа доирасидаги қурилиш ишлари, зарур бўлган лаборатория жиҳозлари ва техник талаблар масалаларига оид фикрлар алмашилди. Суҳбат давомида, ветеринария клиникаси ва виварийни замонавий халқаро стандартларга мувофиқ равишда қуриш ва уларни юқори самарадорликка эга асбоб-ускуналар билан таъминлаш муҳимлигига алоҳида эътибор қаратилди.

Айниқса, клиника ва виварийнинг ишлаш самарадорлигини ошириш учун уларнинг технологик жиҳозлари, энг сўнгги инновацион ечимлар ва юқори технологик стандартларга жавоб берадиган усуллар билан жиҳозланиши зарурлиги таъкидланди. Бу ҳолат, талабаларнинг амалиёт ва тадқиқот ишларини самарали амалга оширишда катта аҳамиятга эга бўлиб, юқори натижаларга эришишга имкон яратади.

Олиб борилган мулоқотдан сўнг, консалтинг компанияси вакиллари филиалдаги мавжуд ўқув лабораторияларини кўздан кечириб, уларнинг ишлаш жараёнини ва ўрнатилган жиҳозларни кўздан кечирди.  Натижада, клиника ва виварийнинг қурилиши учун зарур жиҳозларга бўлган аниқ талаблар белгилаб олинди.

Лойиҳа доирасида ветеринария клиникаси ва виварийнинг замонавий жиҳозлар билан таъминланиши, нафақат Нукус шаҳрида, балки бутун республика бўйича ветеринария ва чорвачилик соҳасини ривожлантиришга янги қадам бўлади.

Беларус Республикасидан келган консалтинг компанияси мутахассисларининг ташрифи лойиҳанинг муваффақиятли амалга ошишини таъминлаш ва ветеринария соҳасининг ривожланиши йўлидаги муҳим қадамларни белгилашга амалий ёрдам беради.

Довуд Абибуллаев, ЎзА мухбири