Кеча Руминиянинг амалдаги Президенти Клаус Йоханнис мухолифат – кескин ўнг партиялар ўзига нисбатан импичмент қўлламоқчи бўлгани сабабли лавозимини тарк этди. Бу ҳақда CNN ёзди.

Украина билан чегарадош, Европа Иттифоқи ва НАТО аъзоси ҳисобланган мазкур давлат ўтган йил ўта ўнгчи, танқидчи Калин Георгеску президентлик сайлови биринчи босқичида ғалаба қозонгач, институционал тартибсизлик қуршовида қолган. Ўшанда тасдиқланмаган айбловлардан сўнг Руминия олий суди бутун сайловни бекор қилди.

Овоз беришнинг икки босқичи 4 ва 18 май кунлари қайта ўтказилиши кутиларкан, ҳукумат, ворис сайланмагунча, 2024 йил 21 декабрда муддати тугаган Йоханнис фаолиятини давом эттиришини айтганди.

Январь ойида эса парламентдаги ўринларнинг 35 фоизини назорат қилувчи учта ўта ўнгчи мухолиф партия Президентга импичмент эълон қилиш учун ариза топширди.

– Сўров мамлакат ичида ҳам, чет элда ҳам салбий оқибатни кўрсатмоқда, – деди Йоханнис журналистларга. – Руминияни бу бемаъни ва салбий инқироздан қутқариш учун истеъфога чиқаман.

Айни дам Сенат спикери, Либерал партия раҳбари ва ҳукмрон коалиция аъзоси Илие Боложан сайловгача чекланган ваколат асосида муваққат Президент лавозимини эгаллаган.

Мусулмон Зиё, ЎзА