Ўзбекистон Республикаси Президенти ва Малайзия Бош вазири ўртасида 2024 йил май ойида Тошкент шаҳрида ўтказилган олий даражадаги мулоқот давомида икки давлат ўртасида коррупцияга қарши курашиш соҳасидаги ҳамкорлик кўламини янада кенгайтириш бўйича келишувга эришилган.

Ушбу келишув ижроси доирасида Ўзбекистон Коррупцияга қарши курашиш агентлиги директори Акмал Бурхонов бошчилигидаги делегация Малайзиянинг Коррупцияга қарши курашиш комиссиясида бўлди. Икки давлат коррупцияга қарши курашишга масъул идоралари ўртасида ўзаро ҳамкорлик муносабатларини янада мустаҳкамлаш ва соҳада амалий алоқаларни кенгайтириш масалалари муҳокама қилинди.

Учрашувда Малайзиянинг коррупцияга қарши курашиш комиссияси Бош комиссари Дато Сри Хожи Азам Бин Баки, шунингдек, Малайзия Коррупцияга қарши курашиш академияси раҳбари Сайфул Эзрал Орифин иштирок этди.

Маълумот учун: 2022 йил май ойида Ўзбекистон Коррупцияга қарши курашиш агентлиги ҳамда Малайзиянинг Коррупцияга қарши курашиш комиссияси ўртасида ҳамкорлик меморандуми имзоланган. Меморандум доирасида икки давлат ўртасида коррупцияга қарши курашиш соҳасида фаол ҳамкорлик олиб борилмоқда. Хусусан, коррупцияга қарши стратегик ҳужжатларни ишлаб чиқиш, коррупциянинг олдини олишда превентив чораларни кўриш, давлат хизматида ҳалоллик тамойилларини жорий қилиш каби масалаларда қўшма лойиҳалар, муҳокама ва тренинглар ташкил этилган. Шунингдек, Малайзия вакиллари ҳар йили Тошкент шаҳрида ўтказиб келинаётган Халқаро аксилкоррупция форумида иштирок этиб келмоқда.

Учрашувда ҳамкорликнинг янги йўналишлари, жумладан, коррупциянинг олдини олишнинг таъсирчан чоралари бўлган жамоатчилик назорати ва журналистик суриштирувларни ўтказиш бўйича қўшма тадбирларни амалга ошириш, Ўзбекистонда ишлаб чиқилаётган “Коррупцияга қарши курашиш бўйича 2030 йилгача мўлжалланган миллий стратегия” лойиҳасини Малайзия экспертларининг таклиф ва тавсиялари асосида такомиллаштириш, ҳуқуқни муҳофаза қилувчи идоралар ходимлари учун коррупциявий ҳолатлар бўйича дастлабки суриштирув, тергов ва маълумотларни йиғиш, шунингдек, давлат харидлари жараёнларида коррупциявий хавфларни аниқлаш ва олдини олиш борасида тренинглар ташкил этиш каби йўналишларда ҳамкорлик қилиш масалалари муҳокама қилинди.

Шунингдек, Малайзия томони шу йил июль ойида Куала Лумпур шаҳрида бўлиб ўтадиган “Ҳалоллик ва корпоратив бошқарув” мавзусидаги халқаро анжуманга Ўзбекистон вакилларини иштирок этишга таклиф қилди.

Учрашув якунида Ўзбекистон Республикаси Коррупцияга қарши курашиш агентлиги билан Малайзия Коррупцияга қарши курашиш комиссияси ўртасида 2025-2026 йилларга мўлжалланган Ҳаракатлар режаси имзоланди.

Ҳужжатда икки давлат аксилкоррупция идоралари ўртасида 2025-2026 йилларда соҳада тажриба алмашиш, илғор амалиётни ўрганиш ва жорий этиш юзасидан ҳамкорликнинг аниқ механизмлари акс этган. Хусусан, томонлар ҳамкорликда йирик қўшма аксилкоррупция тадбирларини ташкил этиш, давлат хизматчиларини коррупцияга қарши ўқитишда Малайзия тажрибасини Ўзбекистонда татбиқ этиш, “ҳалоллик текшируви” лойиҳасини ишга тушириш ҳамда қўшма ўқув дастурлари ишлаб чиқишни режалаштирмоқда. Шунингдек, ҳужжатда давлат органлари ва ташкилотларида коррупцияга қарши ички назорат механизмларини жорий этиш ва улар фаолиятида коррупциявий хавф-хатарларни камайтириш бўйича Малайзия ва Ўзбекистон амалиётини солиштирган ҳолда тажриба алмашиш назарда тутилган.

– Малайзия Агентлигимиз фаолият бошлаган дастлабки даврларданоқ биз учун яқин ва манфаатли ҳамкорлардан бири бўлиб келмоқда, – деди Акмал Бурхонов. – 2022 йилда мамлакатнинг Коррупцияга қарши курашиш комиссияси (МАСС) раҳбари Азам бин Бакининг Тошкентга амалга оширган ташрифи доирасида идораларимиз ўртасида ҳамкорлик меморандуми имзолангани нафақат икки томон фаолиятида, балки Ўзбекистон ва Малайзия ўртасида узоқ давом этадиган ҳамкорликнинг муҳим дебочаси бўлди. Меморандум доирасида тажриба алмашиш, ўзаро фаолиятни такомиллаштириш, кадрлар тайёрлаш, шунингдек, коррупциянинг олдини олиш ва унга қарши курашишда жамоатчилик иштирокини кучайтириш мақсадида аҳолини коррупцияга қарши ўқитиш, уларнинг оммавий ахборот воситалари ва ҳалолликни тарғиб қилувчи кампаниялар ҳақида хабардорлигини ошириш бўйича маълумот алмашинуви ҳам йўлга қўйилди. Ишонаманки, ўзаро ҳамкорлигимиз яқин истиқболда янги ютуқ ва натижалар билан ўз самарасини янада кенгроқ намоён этади.

Мулоқотда Азам бин Баки шундай фикрларни билдириб ўтди: 

– Бугунги кунда дунё бўйлаб коррупцияга қарши курашишда кенг кўламли ишлар амалга оширилмоқда, кўплаб чора-тадбирлар кўрилмоқда. Бу йўналишда тажриба алмашиш жуда муҳим деб ўйлайман. 1967 йилда Малайзия давлатида коррупцияга қарши курашиш қонуни кучга киргандан буён улкан ишлар амалга оширилди ва бунинг натижасида бу соҳада биз анчагина тажриба орттирдик. Коррупцияга қарши курашиш комиссияси ходимлари коррупцияга қарши кураш ва унинг олдини олиш ҳамда ушбу йўналишдаги таълим дастурларини Ўзбекистоннинг Коррупцияга қарши курашиш агентлиги билан бўлишишга тайёр. Биз эса, ўз ўрнида, Ўзбекистоннинг коррупцияга қарши курашишдаги илғор тажрибаларини ўрганишга тайёрмиз. Чунки кейинги йилларда мамлакатингизда ушбу йўналишда катта ислоҳотлар олиб борилаётганини кузатмоқдамиз ва катта ютуқларга эришаётгангизни ҳам кўриб турибмиз.

Мазкур келишув ҳар икки мамлакатнинг ҳуқуқий соҳа ва амалиётдаги ютуқларини бирлаштириш орқали коррупцияга қарши курашишда муваффақиятли натижаларга йўл очади. Ўзаро тажриба ва ишонч бу йўлдаги ҳар бир қадамга яна дадиллик ва қатъийлик, прогрессивлик беради.

Мулоқот якунида муҳокама қилинган ҳамкорлик йўналишларида ишларни жадаллаштиришга келишиб олинди.

Н.Абдураимова, ЎзА