Нидерландиянинг Вейк-ан-Зее шаҳрида шахмат бўйича давом этаётган анъанавий “Tata Steel Chess-2025” турнирининг ортда қолган 7-туридан кейин “Мастерс“ гуруҳида ҳиндистонлик Доммаражу Гукеш 5 очко билан қўшимча кўрсаткичлар эвазига етакчига айланган бўлса, 5 очко жамғарган Нодирбек Абдусатторов 2-ўринда, Рамешбабу Прагнанандха 3-ўринда бормоқда.

Кеча ўтказилган 7-тур ўйинларида нидерландиялик Аниш Гири билан куч синашди. Тенг курашлар остида ўтган ўйиннинг 31-юриш ҳолатига келиб, томонлар муроса йўлини танлади.

Ушбу турда ғолибликка даъвогарлик қиладиган шахматчилардан Рамешбабу Прагнанандха нидерландиялик Йорден ван Форест билан дурангга эришган бўлса, Гукеш ҳамюрти Пентала Харикришнадан устун келди. 4-ўринда бораётган асли россиялик, ҳозирда Словения шарафини ҳимоя қилаётган Владимир Федосеев оқ доналарда германиялик Винсент Кеймерни мағлубиятга учратди.

“Челленжер“ гуруҳида дона сураётган Нодирбек Ёқуббоев 7-турда қора доналарда туркиялик Эдиз Гюрелга имкониятни бой бериб қўйди.

Бугун, 26 январь куни ўтадиган 8-турда Ёқуббоев гуруҳда 1 очко билан сўнгги ўринда бораётган руминиялик Ирина Бульмага билан рўбарў келади. Ушбу ўйинда ҳамюртимиз оқ доналарда ҳаракатланади.

“Мастерс“ гуруҳининг бугун ўтказиладиган 8-туридаги марказий ўйинлар Нодирбек Абдусатторов – Владимир Федосеев, Доммаражу Гукеш – Прагнанандха қарама-қаршилигида бўлиб ўтади.

Эслатиб ўтамиз, 13 та турдан иборат “Tata Steel Chess-2025” турнири 2 февралгача давом этади.

Т.Рўзиев, ЎзА