Нидерландиянинг Вейк-ан-Зее шаҳрида шахмат бўйича давом этаётган “Tata Steel Chess-2025” турнирининг “Мастерс“ гуруҳида ғолиблик учун кураш олиб бораётган Нодирбек Абдусатторов 3-турда ғалабага эришди. Абдусатторов нидерландиялик Макс Вармердамга қарши кечган ўйинда қора доналарда ҳаракатланган бўлсада, рақибини мағлубиятга учратди. Ортда қолган 3 та тур якунларига кўра, ҳамюртимиз 2 та ғалаба ва 1 та дуранг ҳолатида очколари сонини 2,5 тага етказган ҳолда қўшимча кўрсаткичлар эвазига турнир жадвали етакчисига айланиб олди.

Ҳиндистонлик Рамешбабу Прагнанандха ҳамюрти Аржун Эргаисини таслим этиб, 2,5 очко билан Абдусатторовни таъқиб этмоқда. Халқаро турнирнинг етакчи шахматчилари ҳисобланган ҳиндистонлик Гукеш Доммараджу ва америкалик Фабиано Каруана баҳсида томонлар муроса йўлини танлади.

Бугун, 21 январь куни “Мастер” гуруҳида 4-тур учрашувлари бўлиб ўтади. Ушбу турда Нодирбек Абдусатторов хитойлик Вэй И билан рўбарў келади. 2-ўринда бораётган Рамешбабу Прагнанандха ҳамюрти Леон Люк Мендонка билан куч синашади.

Айтиш лозим, Абдусатторов ушбу шахматчини 2-турда оқ доналарда мағлубиятга учратган эди. Прагнанандха билан эса қора доналарда 1-турда дурангга эришганди. “Челленжер“ гуруҳида қатнашаётган Нодирбек Ёқуббоев 3-турда чехиялик Нгуен Тай Дай Ванга ютқазиб қўйди. Ушбу мағлубият Нодирбек Ёқуббоевнинг 1,5 очко билан қўшимча кўрсаткичларга кўра, 7-ўринда жойлашишига олиб келган бўлса, ғалаба туфайли 2,5 очкога эга бўлган Чехия вакилини пешқадамга айлантирди. Ҳозирда мазкур гуруҳда уч нафар шахматчининг 2,5, икки нафарининг 2, беш нафар иштирокчининг эса 1,5 очкога эгалигига эътибор қаратсак, ғолиблик учун курашлар ҳали олдиндалиги ойдинлашади. Бугун ўтказиладиган 4-турда Ёқуббоев оқ доналарда ўзи сингари 1,5 очкога эга ҳиндистонлик Ваишали Рамешбабу билан баҳс олиб боради.

Т.Рўзиев, ЎзА