Саудия Арабистонининг Жидда шаҳрида жойлашган «Қирол Абдуллоҳ» стадиони Испания Суперкубогининг ярим финал босқичидан ўрин олган «Реал Мадрид» ва «Мальорка» клублари баҳсига мезбонлик қилди.
Ушбу учрашувнинг 62-дақиқасида Жуд Беллингем ҳисобни очган бўлса, 90+3-дақиқада Диас иккинчи голни киритди. Родриго эса ўйиннинг 90+5-дақиқасида «Мальорка» дарвозасига учинчи тўпни жойлаб қўйди. Бу натижадан сўнг, “Реал Мадрид” Испания Суперкубоги финалига йўл олди.
Энди Испания Суперкубогининг сўнгги ҳал қилувчи финал баҳсида «Қироллик клуби» Каталониянинг «Барселона» жамоасига қарши ўйин ўтказади. Ушбу ўйин 12 январь кунидан 13 январга ўтар кечаси, Тошкент вақти билан соат 00:00 да «Қирол Абдуллоҳ» стадионида бошланди.
Маълумот ўрнида таъкидлаб ўтиш лозимки, “Реал” жамоаси Испания Суперкубогининг финалида кетма-кет тўртинчи маротаба иштирок этмоқда. Эътиборли жиҳати шундаки, ушбу финалларнинг сўнгги учтаси айнан “Барселона”га қарши ўтмоқда.
Аниқроқ айтадиган бўлсак, 2022 йил мадридликлар “Атлетик Бильбао” билан рақотлашиб, 2:0 ҳисобида ғалабани қўлга киритди.
2023 йилги финалда эса Каталония жамоасига қарши ўтган ўйинда пойтахт клуби 3:1 ҳисобида енгилди. Умид қиламизки, бу йилги “Эл-классико”да футбол мухлислари чиройли ўйин ва голлар шоуси гувоҳига айланади.
Дарвоқе, “Реал” ва “Барселона” клубларининг Испания Суперкубоги доирасидаги ўзаро ўйинлари сони айни дамда 15 тага етган. Унда “Реал” 9 маротаба ғалаба қозонган бўлса, “Барселона” 4 учрашувда ғолиб бўлган. Улар ўртасидаги икки учрашувда дуранг қайд этилган.
Бугунга қадар “Барселона” Испания Суперкубогини 14 маротаба қўлга киритган бўлса, “Реал” ушбу совринга 13 маротаба эга чиққан.
Жавоҳир Тошхўжаев,
ЎзА